شێخ دارا: سەرما دەشکێت و بارانبارین 10 ڕۆژی دیکە بەردەوام دەبێت

ئاڤا نیوز

بەپێی پێشبینییەکان بۆ ماوەی 10ڕۆژی دیکە لە سەنتەری شارەکان بارانبارین بەشێوەی پچڕ پچڕ بەردەوام دەبێت، لە ناوچە شاخاوییەکانیش بەفر دەبارێت.

لێدوانی فەرمی: شێخ دارا، شارەزای کەشناسی و پێشکەشکاری ئاڤا ڕایگەیاند، هەتا 10ـی مانگی داهاتوو بارانبارین بە شێوەی پچڕ پچڕ بەردەوام دەبێت و هەندێکجار بای بەهێزی لەگەڵدا دەبێت، لە ڕۆژانی پێنج و شەشی مانگ کەشوهەوا خۆش دەبێت واتە باران نابارێت کەشوهەوا ئاسایی دەبێت.

هەر بە پێی پێشبینییەکانی شێخ دارا، ڕیژەی بارانبارین لەماوەی ئەم 10 ڕۆژە لە دەوروبەری سلێمانی 95 ملم ، هەولێر 64 ملم، دهۆک 79 ملم دەبارێت.

لەلایەکی دیکەوە: بەڕێوەبەرایەتیی گشتیی کەشناسی هەرێم، کەشی پێشبینیکراوی سبەی پێنجشەممەی بڵاو کردووەتەوە، لەناوچە جیاوازەکان لە کاتەکانی بەیانی زوو نمە بارانی پچڕ پچڕ دەبارێت و لە کاتەکانی نیوەڕۆ ئاسمان دەگۆڕێت بۆ نیمچە هەور، بارانبارین و بەفربارین لەسەر ناوچە سنووریەکان و لووتکەی شاخە بەرزەکان لە هەندێ کاتدا بەردەوامی دەبێت تا دوای نیوەڕۆی ڕۆژی پێنجشەممە.

زانیاریی زیاتر: کەشناسی هەرێم ڕێژەی بڕی بارانی 12 کاتژمێری ڕابردووی هەندێک لە ناوچەکانی هەرێمی کوردستانی بەم شێوەیە دیاریکردووە:

٠ هەولێر 6.3  ملم
٠ پیرمام 8.5 ملم
٠ سلێمانی 13.0 ملم
٠ چەمچەماڵ 15.3 ملم
٠ دهۆک 10.7 ملم
٠ زاخۆ 5.6 ملم