بەرپرسی دەزگای هەڵبژاردنی پارتی: دەمانەوێت زیاتر لە یەک ملیۆن دەنگ بەدەستبهێنین

ئاڤا نیوز

بڕیارە مانگی داهاتوو هەڵبژاردنی پەرلەمانی عێراق بەڕێوەبچێت و بەرپرسێکی پارتی ڕایدەگەێنێت: پێشبینی دەکەن ژمارەی دەنگەکانیان بگەیێننە زیاتر لە یەک ملیۆن.

چیرۆکی سەرەکی: بڕیارە ڕۆژی 11-11-2025، هەڵبژاردنی پەرلەمانی عێراق بەرێوەبچێت، پارتی دیموکراتی کوردستان بە لیستی ژمارە 275 بەشداری لە هەڵبژاردنەکە دەکات، لەم چوارچێوەیەشدا هەوڵەکانی بۆ زیادکردنی ژمارەی دەنگەکانی لە سەرتاسەری عێڕاق چڕ کردووەتەوە.

لێدوانی فەرمی: د. جەعفەر ئیمینکی، بەرپرسی دەزگای گشتیی هەڵبژاردنی پارتی بە ئاڤای ڕاگەیاند: بڕیاری ئێمە ئەوەیە بانگەیەشەیەکی هێمن و لەسەرخۆ بۆ هەڵبژاردنی پەرلەمانی عێراق بکەین، پێشبینی دەکەین لایەنەکانی دیکەش ئەمەیان پێ باش بێت، بەڵام هەندێک لایەنیش دەیانەوێت بۆ هەڵمەتێکی دیکەمان ڕابکێشن، لە دهۆک لایەنی سیاسی هەیە هەوڵی ئەوە دەدات و ئێمەش بە پێویستی نازانین. جاری ڕابردووش یەکێتی لە سلێمانی گەرموگوڕی کرد و ئێمە بە پێویستمان نەزانیوە.

د. جەعفەر ئیمینکی ئەمانەشی وت:

٠ ئێمە لە دوو خولی ڕابردوودا دوو کاندیدی عەرەبمان هەبووە زۆر چالاکن، ئەمجارە بۆ جاری سێیەم کاندیدن و حەوت کاندیدی دیکەی عەرەبیمان لەگەڵ لیستی دیکە بەشداری دەکەن و لە وڵاتی دیموکراسی ئەمە کارێکی زۆر ئاساییە.

٠ بەشێوەیەکی زۆرباش خۆمان بۆ هەڵبژاردن ئامادە کردووە، دەمانەوێت ژیانێکی دیموکراسی بۆ خەڵکی عێراق فەراهەم بکەین و لەڕێگەی زیادکردنی ژمارەی کورسییەکانمان، کاریگەریی زیاتر دروست بکەین.