کەنەدا بڕیارێک دژی سەرۆککۆماری ئێران دەردەکات

ئاڤا نیوز

 

کەنەدا جارێکی دیکە سنووردارییەکانی سەر بەرپرسانی ئێرانی بۆ سەردانیکردنی ئەو وڵاتە زیاتر دەکات و ڕێکارە نوێیەکانیش مەسعود پزیشکیان، سەرۆککۆماری ئێران دەگرێتەوە.

وێنە گەورەکە: دانانی ئەم سنووردارییانە دەگەڕێتەوە بۆ ساڵی 2003، کە زیبا (زەهرا) کازمی، هاووڵاتیی کەنەدی لە ئێران کوژرا. دواتریش لە ساڵی 2022، دوای کوژرانی مەهسا (ژینا) ئەمینی، سنووردارییەکان خرانە بواری جێبەجێکردنەوە. 

زانیاریی زیاتر: پێشتر سنووردارییەکە هەموو ئەو بەرپرسانەی دەگرتەوە کە لە مانگی 11 ی ساڵی 2019ـەوە لە ئێران چووبوونە ناو دەستەڵات، ئیستا هەموو ئەوانەش دەگرێتەوە کە لە 2003ـەوە لەناو دەستەڵاتی ئێران پێگەی دیاریان هەبووە.

ئەوەی پێویستە بیزانیت: لەکاتی کوژرانی زیبا کازمی، مەسعود پزیشکیان، سەرۆککۆماری ئێستای ئێران، وەزیری تەندروستی بووە. بەمپێیە بە جێبەجێکردنی ئەم سنووردارییە نوێیانە ڕێگە بە چوونی پزیشکیان بۆ کەنەدا نادرێت.