وەزارەتی بەرگریی عێراق: پێشمەرگە هێزێکی نیشتمانییە

ئاڤا نیوز

 

وەزارەتی بەرگریی عێراق وەڵامی لێدوانەکەی محەممەد حەلبووسی، سەرۆکی دوورخراوەی پەرلەمان لەبارەی پێدانی چەک بە پێشمەرگە دەداتەوە و دەڵێت: پێشمەرگە هێزێکی نیشتمانییە.

 

وێنە گەورەکە: وەزارەتی بەرگری لەبارەی تۆپهاوێژی هاوتزەری (105) ملمی کە بۆ هێزەکانی پێشمەرگە تەرخان کرا بوو  ڕوونکردنەوە دەدات و داوا دەکات هاونیشتمانییان بە هەواڵی ساختەی میدیا و سۆشیاڵمیدیا باوەڕ نەکەن.

 

ڕاگەیێنراوی فەرمی: وەزارەتی بەرگریی عێراق لە بەیاننامەیەکەدا ڕایگەیاند: گرێبەستی ئەو تۆپهاوێژانە لە سەردەمی عیرفان حەیالی، وەزیری پێشووتری بەرگری واژۆ کرابوون و لە سەردەمی جومعە عیناد، وەزیری پێشووی بەرگری هەموارکراوەتەوە و پێش پێکهێنانی حکومەتەکەی سوودانی پارەی ئەو چەکانە دران.

 

زانیاریی زیاتر: ئەو تۆپهاوێژانە لە 20ـی تشرینی دووەمی ساڵی 2023 گەیشتبوونە بەندەری ئوم قەسر و دوای ساڵێک ئەو چەکانە ڕادەستی پێشمەرگە کران، ئەوەش بە پشتبەستن بە یاداشتی سەرۆکی ئەرکانی سوپا بۆ فەرماندەی گشتیی هێزە چەکدارەکان و دوای گرتنەبەری هەموو ڕێوشوێنێکی پێویست.

 

ئەوەی پێویستە بیزانیت: لەماوەی ڕابردوودا محەممەد حەلبووسی، سەرۆکی دوورخراوەی پەرلەمانی عێراق دژایەتی خۆی بۆ پرچەککردنی هێزەکانی پێشمەرگە ڕاگەیاند و بە مەترسیی لەسەر دۆخی ناوخۆ وەسفی کردن، ئەمەش کاردانەوەی زۆری بەدوای خۆیدا هێناو و تەنانەت خەمیس خەنجەر وەڵامی حەلبووسی دایەوە.