لەسەر مووچەی مانگەکانی ئەمساڵ هەوراز گوڵپی داوایەک ئاراستەی حیزبە کوردییەکان دەکات

ئاڤا نیوز

حکومەتی عێراق دەڵێت کێشەیان لە ناردنی دوو مووچەی دیکە نییە، واتا مووچەی مانگەکانی نۆ و 10 بێ کێشە دەنێردرێن، بەڵام مەترسی لەسەر مووچە مانگەکانی 11 و 12 هەیە، بۆ ئەم مەبەستەش، هەوراز گوڵپی داوایەک ئاراستەی حیزبە کوردییەکان دەکات.

وێنە گەورەکە: مووچەخۆرانی کوردستان تا ئێستا هەشت مووچەیان وەرگرتووە، چوار مووچە ماوە و نزیک دەبینەوە لە کۆتایی ساڵ، ئەگەرەکان دەریدەخەن کە لەم ماوەی ماوە بۆ کۆتایی ساڵ حکومەتی عێراق ناتوانێت چوار مووچە ڕەوانە بکات و چارەنووسی دوو مووچە نادیار دەبێت.

بەغدا بەردەوام دەڵێت کێشەیان هەیە و پارەی کاشیان نییە، مەسرور بارزانی، سەرۆکوەزیرانی کوردستانیش پێداگرە لەسەر ئەوەی نابێت هیچ مووچەیەکی ئەمساڵ بفەوتێن.

ئەوەی پێویستە بیزانیت: ناردنی ئەو دوو مووچەیە یەکێک لە مەرجەکانی پارتییە بۆ پێکهێنانی حکومەتی نوێی عێراق، لەگەڵ چارەسەرکردنی پرسی مووچە بەیەکجاری.

پەیامی فەرمی: هەوراز گوڵپی، پێشکەشکاری سەعات حەوتی ئاڤا پەیامێکی بۆ حیزبەکان هەیە، بەتایبەت پارتی و یەکێتی، دەڵێت، حەقە هەموو پێداگرییەک بکەن بۆ ناردنی ئەو دوو مووچەیە، بێ وەرگرتنی گەرەنتی لە ناردنی ئەو دوو مووچەیە، نەچنە حکومەتێکەوە و پلە و پۆست وەرمەرگرن، هەر پۆستێکتان هەبێت گرنگ نییە، بەڕاستی حەق نییە مووچە ببێتە قوربانی پلە و پۆست.

بە هەموو ئەگەرێک دوو مووچە دەکەونە ساڵی داهاتوو، بۆیە پێویستە میکانیزمێک لەنێوان هەولێر و بەغدا بدۆزێتەوە بۆ ناردنیان،  دەبێت لە بودجەی 2026 پارە جیابکرێتەوە.

دەشڵێت؛ هیوادارین سازش نەکرێت لەسەر ئەو مەرجە، بینیمان لەدوای 2003ـەوە  پلە و پۆست تاقی کرایەوە هیچ سوودی نەبوو.