ئافرەتانی کەرتی نەوت و گازی بەسرە ڕووبەڕووی گێچەڵی سێکسی دەبنەوە

ئاڤا نیوز

 

ڕێکخراوی کاری نێودەوڵەتی دەرەنجامی هەڵسانگاندنی بارودۆخ و ژینگەی کاری لە کەرتی نەوت و گازدا لە پارێزگای بەسرە لە عێراق بڵاوکردەوە، 57%ـی ئافرەت و 10%ـی پیاوان ڕووبەڕووی گێچەڵی سێکسی بوونەتەوە.

 

وێنە گەورەکە: ڕێکخراوی کاری نێودەوڵەتی بە هاوبەشیی حکومەتی خۆجێی بەسرە، وۆرک شۆپێکی ئەنجامدا کە چەندین بەرپرسی حکومی و ڕێکخراو و کۆمپانیاکانی ناوخۆیی و نێودەوڵەتی تێیدا بەشدار بوون.

 

ڕاگەیێنراوی فەرمی: مەها قەتاع، ڕێکخەری ناوچەیی ڕێکخراوی کاری نێودەوڵەتی بە ئاڤا نیوزی ڕاگەیاند: ئافرەتان بەشدارییان کەمە، کە بە ڕێژەی 40% لە کۆمپانیا نێودەوڵەتی و 25%ـی ناوخۆییەکان و  50%ـی کۆمپانیا نێودەوڵەتییەکان بەرنامەی بەهێزکردنی لێهاتووییەکان پێشکەش دەکەن، لە کاتێکدا ڕێژەکە لە کۆمپانیاکانی خۆماڵی تەنیا 26%ـە.

 

زانیاریی زیاتر: 85%ـی کۆمپانیا ناوخۆیی و 50%ـی کۆمپانیا نێودەوڵەتییەکان مووچەی مۆڵەتی دایکایەتی نادەن، واتە ئەو ئافرەتانەی بەهۆی منداڵ خستنەوە یان بەهۆی بەخێوکردنی منداڵی ساوا  لە کار دوور دەکەونەوە، مووچەکانیان بۆ هەژمار ناکرێت، سەبارەت بە پاراستنی کۆمەڵایەتی 63%ـی کۆمپانیا نێودەوڵەتی و 27%ـی کۆمپانیا ناوخۆییەکان نیوەی فەرمانبەرەکانیان تۆمار دەکەن.

 

ئەوەی پێویستە بیزانیت: 75%ـی کۆمپانیا نێودەوڵەتی و نیوەی کۆمپانیا ناوخۆییەکان بێ ئاگان لە کاریگەرییان لەسەر گۆڕانی ئاو و هەوا، تەنیا بەشێکی کەمی کۆمپانیاکان سیاسەتی چارەسەرکردنی ئەم دیاردانەیان هەیە، واتە 63%ـی کۆمپانیا نێودەوڵەتی و 55%ـی ناوخۆییەکان ئامرازی گواستنەوەی پارێزراو بۆ فەرمانبەرانیان لە هەردوو ڕەگەزەوە دابین دەکەن.