ناکۆکی دوو بەرە ناکۆکەکەی گۆڕان بەربژێرەکانی بزووتنەوەکە دەکاتە قوربانی

ئاڤا نیوز

 

چەند کاتژمێرێک دوای دەستنیشانکردنی دانا ئەحمەد مەجید وەک ڕێکخەری گشتیی بزووتنەوەی گۆڕان، دەرگایەکی دیکەی ئاڵۆزی لەنێو دوو بەرە ناکۆکەی بزووتنەوەکە کرایەوە و بەجۆرێک بێباکی بەرامبەر بەربژێرانی حیزبەکە پیشاندەدەرێت.

 

چیرۆکی سەرەکی: دوانیوەڕۆی ڕۆژی شەممە 28-09-2024 لە دەرەوەی گردی زەرگەتە، ڕێکخەری نوێی گۆڕان بەوەکالەت دەستنیشان کرا و ڕێوڕەسمی دەستاودەستکردنی دەسەڵات لە عومەری سەید عەلییەوە بۆ دانا ئەحمەد مەجید بەڕێوەچوو.

 

وێنە گەورەکە: ناکۆکی نێو دوو باڵەکەی گۆڕان کاریگەری خستووەتە سەر چارەنووسی بەربژێرەکانی گۆڕان بۆ هەڵبژاردنی خولی شەشەمی پەرلەمانی کوردستان، بەشێوەیەک دڵنیاییان نییە لەوەی پاڵپشتیان دەکرێت یاخود دەبنە قوربانی، ئەگەر هەیە قووڵبوونەوەی ناکۆکییەکان داخستنی کەناڵی کەی ئێن ئێن زمانحاڵی بزووتنەوەکەشی لێبکەوێتەوە.

 

زانیاریی تایبەت: سەرچاوەیەک لە بزووتنەوەی گۆڕان بە ئاڤا نیوزی گوت، " باڵی کوڕانی نەوشیروان مستەفا لەگەڵ بەشداریکردنی بزووتنەوەکە لە هەڵبژاردن نین و دەیانەوێت لەو پڕۆسەیە بکشێنەوە، لەبەرامبەردا باڵی عومەری سەید عەلی بە بەربژێرەکانیان گوتووە ئەگەر خۆیان لە بەرژەوەندی کوڕەکانی نەوشیروان مستەفا یەکلایی بکەنەوە، ئەوا هیچ پاڵشتییەک ناکرێن و لە کەناڵەکەش ڕێکلامیان بۆ ناکرێت."

 

ئەوەی پێویستە بیزانیت: بزووتنەوەی گۆڕان 58 بەبژێری لە هەرچوار بازنەکەی هەرێمی کوردستان هەیە، 41 بەربژێر سلێمانی، 11 بەربژێر هەولێر، دهۆک سێ بەربژێر و هەڵەبجەش سێ بەربژێری دیاریکردووە.