سەعدی پیرە: دەمانەوێت لە حکومەتی هەرێمی کوردستان هاوبەشی ڕاستەقینە بین

ئاڤا نیوز

سەعدی ئەحمەد پیرە، بە ئاڤای ڕاگەیاند، هەلومەرج و بارودۆخی ناوچەکە وادەخوازێت کابینەیەکی بنکەفراوانی بەهێز پێکبهێندرێت و دەمانەوێت لە حکومەتی هەرێمی کوردستان هاوبەشی ڕاستەقینە بین نەوەک تەنیا بەشداری کابینەکە بکەین. 

لێدوانی فەرمی: سەعدی ئەحمەد پیرە، ئەندامی مەکتەبی سیاسیی یەکێتیی، بە ئاڤا میدیای گوت: بۆ پێکهێنانی کابینەی نوێی حکومەتی هەرێمی کوردستان، داوای پەنجا بە پەنجامان نەکردووە، بەڵکو دەمانەوێت هاوبەشی ڕاستەقینە بین، نەک تەنیا بەشداری لە کابینەکە بکەین، بەڵام پارتی دەیەوێت ئێمە بەشدار بین.

سەعدی پیرە ئەمانەشی گوت:

٠ لە پێکهێنانی کابینەی نوێ دەمانەوێت لە مەلەفەکانی دارایی، وەبەرهێنان، وزە، پەیوەندییەکانی دەرەوە، دادوەری و ئەمنی بوونی هەبێت.

٠ هەلومەرج و بارودۆخی ناوچەکە وادەخوازێت کابینەیەکی بنکەفراوانی بەهێز پێکبهێنین و هەموو لایەنەکان بەشداربن، ئەو لایەنانەشی بڕیاریان داوە بەشدارنابن، پێویستە دووبارە کۆبوونەوەیان لەگەڵ بکرێت.

٠ لەگەڵ دووبارە کردنەوەی هەڵبژاردن نین، چونکە کورسیەک کەم و زیاد کاریگەری لەسەر پێگەی یەکێتی و پارتی دروست ناکات.

٠ کاندیدی یەکێتی بۆ پۆستی جێگری سەرۆککوەزیرانی هەرێمی کوردستان لە مەکتەبی سیاسی و سەرکردایەتیی یەکێتی پێشنیاز دەکرێت و بڕیاری کۆتایی لای بافڵ تاڵەبانییە.

٠ دەبێت پارتی و یەکێتی ڕێکبکەون و داواکاری یەکتر قبوڵ بکەن، چونکە بەبێ پارتی و یەکێتی کابینەی حکومەت لە هەرێمێکی یەکگرتوو پێکناهێنرێت.