وانەبێژانی زانکۆ و پەیمانگەکان کەی مووچە بە زیادکراوی وەردەگرن؟

ئاڤا نیوز 

 

دوای بە گرێبەستبوونیان بڕیارە وانەبێژانی زانکۆ و پەیمانگاکان مانگی 10 یەکەم مووچە بە زیادکراوی وەردەگرن. 

 

وێنە گەورەکە: سەرۆکوەزیران مەسرور بارزانی ڕەزامەندی لەسەر دامەزراندنی وانەبێژانی زانکۆ و پەیمانگەکان بە گرێبەست دەربڕی و ئەمڕۆ سێشەممە نووسراوەکە واژۆ کرا.

 

لێدوانی تایبەت: سەرچاوەیەک لە ئەنجوومەنی وەزیرانی هەرێمی کوردستان بە ئاڤا نیوزی گوت: دوای ڕەزامەندی سەرۆکوەزیران، فەرمانەکە لە نووسینگەی تایبەتیەوە  ڕەوانی دیوانی ئەنجوومەنی وەزیران کراوە، لەم یەک دوو ڕۆژە ڕەوانەی وەزارەتی داریی و ئابووری دەکرێت بۆ ئەوەی مووچەیان بۆ ببەسترێت.

 

ئەمە لەبارەی دامەزراندنی وانەبێژانی زانکۆ و پەیمانگەکان کە ژمارەیان زیاتر لە سێ هەزار و 300 کەسە، بەڵام پرسیارە سەرەکییەکە ئەوەیە کەی مووچە بەگرێبەست وەردەگرن؟

 

سەرچاوەیەکی ئاگادار لە وەزارەتی دارایی و ئابووریی قسەی ئاڤا نیوز کرد و گوتی: ئەگەر بەخێرایی و لەم چەند ڕۆژە ڕێکارەکان تەواو بکرێن، ئەوا مانگی یانزە مووچەی مانگی 10 بە زیادکراوی وەردەگرن.

 

ئەوەی پێویستە بیزانیت: هەر پەیوەست بە مامۆستایانی وانەبێژ، پێشتر بڕیاری دامەزراندنی وانەبێژانی قوتابخانەکان واژۆکرابوو کە ژمارەیان 38 هەزار کەسە، ڕێکارەکان تەواوکراون و بڕیارە مووچەی مانگی نۆیان بە زیادکراوی وەربگرن.

 

ئەوەش بزانە: ئێستا وانەبێژان شایستەی دارایی مانگی پێنجیان وەرگرتووە، لەم ڕۆژانە مانگی شەش لەگەڵ مووچەی مانگی هەشتی فەرمانبەران وەردەگرن، ئەوەی دەمێنێتەوە شایستەی دارایی مانگەکانی حەوت و هەشتیان دەمێنێت و هاوشێوەی ڕابردوو دەبێت، لە مانگی نۆوە مووچەیان زیاد دەبێت، دیبلۆم 400 هەزار  و بەکالۆریۆس 500 هەزار دینار.

 

مووچەی وانەبێژان دوای دامەزراندنیان بەگرێبەست بەمشێوەیە دەبێت:

- دیبلۆمی باڵا یەک ساڵ و بەکالۆریۆس چوار ساڵ و پێنج ساڵ: 600 هەزار دینار.

- ماستەر و دیبلۆمی باڵا دوو ساڵ، بەکالۆریۆس شەش ساڵ پسپۆڕی زانستە مرۆڤایەتییەکان: 850 هەزار بۆ یەک ملیۆن دینار.

- دکتۆرا پسپۆڕی زانستە مرۆڤایەتییەکان: یەک ملیۆن و 100 هەزار دینار بۆ یەک ملیۆن و 250 هەزار دینار.

- هەر ئەمساڵ بە فەرمانی سەرۆکوەزیران مەسرور بازرانی 38 هەزار وانەبێژی قوتابخانەکان گرێبەستیان بۆ کرا و بڕیارە مووچەی مانگی نۆ بە گرێبەست وەربگرن.