ئاڤای خەڵک؛ خۆڵ و خاشاک دانیشتووانی گەڕەکی بێرکۆتی نوێی هەولێری هەراسان کردووە

ئاڤا نیوز

 

دانیشتووانی گەڕەکی بێرکۆتی نوێ لە شاری هەولێر، ناڕەزایەتی دەردەبڕن بەرامبەر بە کەڵەکەبوونی بڕێکی زۆری خۆڵ و خاشاک لە گەڕەکەکەیاندا و دەڵێن ئەم دۆخە بووەتە هۆی هەراسانکردن و بێزارکردنیان.

 

چیرۆکی سەرەکی؛ ڕێژنە خدر، یەکێک لە دانیشتووەکانی گەڕەکەکە، لە ڕێگەی ناردنی چەند وێنەیەکەوە بۆ ئاڤا، نیگەرانی خۆی دەربڕیوە و دەڵێت: "تیمەکانی شارەوانی زۆر درەنگ سەردانی گەڕەکەکەمان دەکەن، هەندێک جار بە هەفتەیەکیش نایانبینین."

 

ناوبراو ئاماژەی بەوەش کرد کە بەهۆی دواکەوتنی تیمەکانی پاککردنەوە، بەردەرکی ماڵەکانیان شێوەی زبڵخانەی وەرگرتووە. وتیشی: "بە ناچاری خۆمان دەچین و خۆڵ و خاشاکەکان لەو زەوییە بەتاڵانە فڕێ دەدەین کە هێشتا نەبوونەتە خانوو."

 

لێدوانی فەرمی؛ ژیار جەلال، بەڕێوەبەری خزمەتگوزاری و ژینگەپارێزیی هەولێر، بە ئاڤای گوت، ئاگاداری ئەو کێشەیە نەبوون و وتی: "نەمانزانیوە کێشەیەکی لەو شێوەیە بوونی هەبێت. بەدڵنیاییەوە بەدواداچوونی بۆ دەکەین و هەر کێشەیەک هەبێت، چارەسەری دەکەین."

 

بەڕێوەبەری خزمەتگوزاری و ژینگەپارێزی هەروەها دڵنیایی دا کە "تیمەکانمان ڕاسپاردووە کە هەفتانە سێ ڕۆژ سەردانی گەڕەکەکە بکەن بۆ کۆکردنەوەی زبڵ و خاشاک."