پارتی: دەستكاریكردنی ئەنجامەكانی هەڵبژاردن هێڵی سوورە

ئاڤا نیوز

 

پارتی دیموكراتی كوردستان لە ڕاگەیێنراوێكدا ئاماژە بە ئەوە دەكات كە دەستكاریكردنی ئەنجامەكانی هەڵبژاردن "قبووڵكراو نییە و هێڵی سوورە".

 
وێنە گەورەكە: پارتی دیموكراتی كوردستان لە خولی شەشەمی پەرلەمانی عێراق زیاتر لە ملیۆنێك و 100 هەزار دەنگی بەدەست هێنا و بووە خاوەنی 27 كورسیی پەرلەمان هاوكات بەدەستهێنانی پێنج كورسیی كۆتاكان كە نزیكن لە حیزبەكەوە، بەپێی ڕاگەیێنراوی مەكتەبی سیاسیی حیزبەكە، ئێستا هەوڵێك هەیە بۆ دەستكاریكردنی دەنگ و كورسیی كۆتاكان.

ڕاگەیێنراوی فەرمی: مەكتەبی سیاسیی پارتی دیموكراتی كوردستان ئەمشەو سێشەممە 18-11-2025، ڕاگەیێنراوێكی بڵاو كردەوە و ڕایگەیاند: پرۆسەی هەڵبژاردنی خولی شەشەمی ئەنجوومەنی نوێنەرانی عێراقی فیدراڵ لە ڕێكەوتی لە كەشوهەوایەكی دیموكراسیانە و ئازادانە و بە ڕێكوپێكی و شەفافانە ئەنجامدرا و لیست و قەوارە سیاسییەكان و کاندیدی كۆتاكان بەگوێرەی یاسا بەركارەكان و ڕێنماییەكان بەشدارییان كرد. كۆمیسیۆنی باڵای سەربەخۆی هەڵبژاردنەکان دوای ئەنجامدانی ڕێككارە یاساییەكان ئەنجامی كۆتایی بەشێوەیەكی فەرمی ڕاگەیاند.

 

زانیاریی زیاتر: مەكتەبی سیاسیی پارتی دەشڵێ: لێرە و لەوێ گوێبیست دەبین كە هەواڵێك هەیە بۆ دەستوەردان لە ئاكامی هەڵبژارد، بەتایبەتی كۆتاكان و گۆڕینی ئاكام و ئەنجامەکان! ئێمە لە مەكتەبی سیاسی پارتی دیموكراتی كوردستان ڕایدەگەیەنین، کە بەهیچ شێوەیەك دەستوەردان و گۆڕینی ئاكامەكانی هەڵبژاردن بە گشتی و كۆتاكان بەتایبەتی قبووڵكراو نییە و بە هێڵی سووری دادەنێین.

 

هەنگاوی داهاتوو؛ ئەوەشی خستووەتە ڕوو كە لە ئەگەری دەستوەردان و گۆڕانكاری لە ئەنجامە ڕاگەیێنراوەکان لەلایەن كۆمیسیۆنی هەڵبژاردنەکان، هەڵوێستی سیاسیی جدیی دەبێت.