ئاڤای خەڵک؛ ئاڤا بەدواداچوون بۆ گرفتی 'شەشەکانی گەڕەکی تاڤگە' لە سلێمانی دەکات

ئاڤا نیوز

 

دانیشتووانی کۆڵانی شەشەکانی گەڕەکی تاڤگە لە شاری سلێمانی، بەهۆی تەواونەکردنی پڕۆژەیەکی خزمەتگوزارییەوە ڕووبەڕووی کێشەی هاتووچۆ بوونەتەوە و کۆڵانەکەیان بووەتە مەیدانێکی گەورەی قوڕ و لیتە.

 

چیرۆکی سەرەکی؛ هاووڵاتییەکی گەڕەکەکە گلەیی لە دۆخەکە دەکات و دەڵێت: "کێشەکە بەهۆی دروستکردنی ئاوەڕۆی کۆڵانەکەمانەوە دروست بووە. شارەوانی کۆڵانەکەی هەڵکەند، بەڵام دوای ئەوە قوڕ و لیتەکەی پاکنەکردەوە و بەجێی هێشت." دەشڵێت، دۆخەکە ئەوەندە خراپە "ئێستا نەک هەر منداڵەکانمان، بەڵکو سەیارەکانیشمان دەچەقن و دەرناچن."

 

لێدوانی فەرمی؛ لەلایەن خۆیەوە، زەردەشت ڕەفیق، وتەبێژی سەرۆکایەتیی شارەوانیی سلێمانی، لە لێدوانێکدا بۆ ئاڤا هۆکاری تەواونەکردنی پڕۆژەکە ئاشکرا دەکات و دەڵێت: "ئێمە دەستمان بە دروستکردنی ئاوەڕۆی گەڕەکەکە کرد، بەڵام پارەمان لەبەردەست نەما بۆ ئەوەی کارەکە تەواو بکەین."

 

وتەبێژی شارەوانیی سلێمانی دڵنیایی دەداتە هاووڵاتیان کە داواکارییان ئاراستەی وەزارەتی شارەوانیی حکومەتی هەرێمی کوردستان کردووە و "هەرکاتێک بودجەی پێویستمان بۆ تەرخان بکرێت، دەستبەجێ پڕۆژەکە تەواو دەکەین."