نزیکەی 150 یەکەی نیشتەجێبوون بەسەر کەسوکاری شەهیدان دابەش دەکرێن

ئاڤا نیوز

 

لە ئیدارەی سەربەخۆی سۆران بەشێکی ئەو یەکانە تەواوکراون کەوا بڕیارە بەسەر خێزانی شەهیدان و کەمدەرامەتان دابەش بکرێت، لە چەند ڕۆژی داهاتوودا بەشێکیان وەک دیاریی سەرۆکوەزیران مەسرور بارزانی بەسەر کەسوکاری شەهیدانی شەڕی داعش دابەش دەکرێن.

 

وێنە گەورەکە: حکومەتی هەرێمی کوردستان، 29 هەزار یەکەی نیشتەجێبوون لەسەرجەم پارێزگا و ئیدارە سەربەخۆکان بۆ کەمدەرامەتان و کەسوکاری شەهیدان بە قەرزی درێژخایەن دروست دەکات، نۆ هەزار و 400 یەکەیان لەلایەن وەزارەتی ئاوادانکردنەوە و نیشتەجێکردن سەرپەرشتی کراون، ئێستا بەشێکیان ئامادەن بۆ دابەشکردن.

 

زانیاریی تایبەت: سەرچاوەیەک لە وەزارەتی ئاوەدانکردنەوە و نیشتەجێکردنی حکومەتی هەرێمی کوردستان بە ئاڤا نیوزی ڕاگەیاند، "144 یەکەی نیشتەجێبوون  لە سنووری ئیدارەی سەربەخۆی سۆران تەواوکراون، لەماوەی دوو هەفتەی داهاتوو بەسەر کەسوکاری شەهیدانی شەڕی داعش دابەش دەکرێن."

 

لێدوانی فەرمی: کەریم کاوە، بەڕێوەبەری گشتیی شەهیدان و ئەنفالکراوانی سۆران بە ئاڤا نیوزی ڕاگەیاند، "لیستی کەسوکاری شەهیدانی شەڕی داعشمان بەرزکردووەتەوە، ئەو 144 یەکەیە دیاریی سەرۆکوەزیران مەسرور بارزانییە بۆ کەسوکاری شەهیدانی شەڕی داعش."

 

زانیاریی زیاتر: تاوەکو ئێستا میکانیزمی دابەشکردنی یەکەکان یەکلایی نەکراوەتەوە، هاوکات بڕیارە لە سنووری پارێزگای هەولێریش ژمارەیەک یەکە بۆ کەسوکاری شەهیدان تەرخان بکرێت.

 

ئەوەی پێویستە بیزانیت: لە سنووری ئیدارەی سەربەخۆی سۆران دوو هەزار و 146 یەکەی نیشتەجێبوون لەسەر ڕووبەری 35 دۆنم زەوی دروست دەکرێن، کە 800 یەکەیان لەلایەن دەستەی وەبەرهێنانی کوردستان دروست دەکرێن.