کاتژمێرەکانی پێدانی کارەبای نیشتمانی زیاد دەکرێن

ئاڤا نیوز

 

گۆڕانکاری لە کاتەکانی کارەبای نیشتمانی کراوە و کاتژمێرەکانی پێدانی کارەبا بە ڕێژەیەکی بەرچاو لە سەرجەم ناوچەکان زیادی کردووە، لەم مانگەدا پێدانی کارەبا لەنێوان 12 بۆ 17 کاتژمێرە.

 

وێنە گەورەکە: وەزارەتی کارەبای حکومەتی هەرێمی کوردستان، بەڕژدی کار بۆ جێبەجێکردنی پلانی کارەبای 24 کاتژمێری دەکات، بۆ ئەمەش پرۆسەیەکی ئەزموونی لە چەند گەڕەکێکی هەولێر دەستپێکردووە.

 

لێدوانی فەرمی: ئومێد ئەحمەد، گوتەبێژی وەزارەتی کارەبای حکومەتی هەرێمی کوردستان، بە ئاڤا نیوزی گوت: لە سەرەتای ئەم مانگەوە تاوەکو ئێستا گۆڕانکاریی زۆر بەسەر پێدانی کاتژمێرەکانی کارەبادا هاتووە و زیادبوون.

 

شێوازی پێدانی کارەبای نیشتمانی بەمجۆرە بوو:

هەولێر: لە 12 بۆ 13 کاتژمێر
سلێمانی: 14 بۆ 16 کاتژمێر
دهۆک: 15 بۆ 17 کاتژمێر

هەنگاوەکانی کارەبای 24 کاتژمێری بە چی گەیشت؟

گوتەبێژی وەزارەتی کارەبا دەڵێت: ئێستا لە دیراسەکردنی بازنەی یەکەمی کارەبای 24 کاتژمێرین و بەشێوەیەکی گشتی ئەرێنییە، چونکە خواست لەسەر بەکارهێنانی کارەبا کەمبووەتەوە و هاوبەشانی هەڵپەیان بۆ کارەبا بەمشێوەیە نامێنێت، جگە لەوەش لۆد لەسەر دامودەزگاکانی کارەبا کەمتر دەبێتەوە و سیستم جێگیر دەبێت.

 

گشتگیرکردنی کارەبای 24 کاتژمێری بۆ هەرێمی و کوردستان چەند کاتی دەوێت؟

بازنەی یەکەمی هەنگاوەکە لە هەولێرە و تیرەی بازنەکە لە ئایندەیەکی نزیکدا گەورەتر دەکرێت، چونکە هەر هەنگاوێک چوار مانگی پێویستە بۆ جێبەجێکردن، هاوکات چوار مانگیش بۆ دیراسەکردن، بۆیە گشتگیرکردنی پرۆسەکە و تەواوکردنی دەکەوێتە نێو کابینەی 10ـی حکومەتی هەرێمی کوردستان، چونکە خواست لەسەر بەکارهێنانی کارەبا کەمبووەتەوە و هاوبەشانی هەڵپەیان بۆ کارەبا بەم شێوەیە نامێنێت، جگە لەوەش لۆد لەسەر دامودەزگاکانی کارەبا کەمتر دەبێتەوە و سیستم جێگیر دەبێت.