مەسرور بارزانی لەبارەی بانگەشەی لایەنەکان: شانۆگەری نییە هەندێک هەرزەکار خەڵک بخەنە پێکەنین

ئاڤا نیوز

مەسرور بارزانی، جێگری سەرۆکی پارتی لەبارەی بانگەشەی هەڵبژاردنی لایەنەکان دەڵێت: ژیان شانۆگه‌ری نییه‌ تاوه‌كو هەندێک هەرزەکار بە نمایشێكی كۆمێدی خەڵک بخەنە پێکەنین.

 

چیرۆکی سەرەکی: لە شاری دهۆک یەکێک لە گەورەترین کەرناڤەڵەکانی پارتی بۆ بانگەشەی هەڵبژاردن بە ئامادەبوونی نێچیرڤان بارزانی و مەسرور مارزانی، جێگرانی سەرۆکی پارتی و بە بەشداریی نزیکەی 60 هەزار کەس بەڕێوەچوو.

لێدوانی فەرمی: مەسرور بارزانی لە سەرەتای قسەکانیدا بە ناڕاستەوخۆ باسی بانگەشەی هەڵبژاردنی لایەنەکانی کرد و گوتی: "ژیان شانۆگەری نییە، بە نمایشێکی کۆمیدی هەندێک هەرزەکار و نسێلە پێی پێکەنن، ژیان پڕە لە هەوراز و نشێو، پێویستە حکومڕانی داهاتووی هەرێمی کوردستان لە دەستی خەڵکێک بێت، جێگەی باوەڕی خەڵک بێت، ئەزموونی هەبێت، خۆنەچەمێنێت، نەترسێت و بەرامبەر هەموو تەحەدییەکان بووەستێت، هیچ گومانی تێدا نییە، تاکە لایەن کە تاوەکو ئێستا لەگەڵ خەڵک مابێت و هەتاهەتایەش لەگەڵ خەڵک بێت، پارتی دیموکراتی کوردستانە".

 

بابەتی ستراتیژی: مەسرور بارزانی جەختی کردەوە "چەند ڕۆژێکی دیکە بڕیار لە چارەنووسی وڵاتی خۆمان دەدەین، دەبێت کوردستان لە دەستێکدا بێت ڕووبەڕووی مەترسییەکان ببێتەوە، تەنیا پارتی لەگەڵ خەڵکی کوردستان دەوەستێت".

لەلایەکی دیکەوە: جێگری سەرۆکی پارتی بە شانازیەوە گوتی: "پارتی تاکە لایەنە باسی دواڕۆژی کوردستان دەکات، هاوکات پەیامی لایەنەکان باسی دواڕۆژ و داهاتووی خەڵک ناکات، تەنیا دەیانەوێ ڕیگە لە بەرەوپێشچوونەکانی پارتی بگرن، ئێمەش پێیان دەڵێین ناتوانن".