ئاگرێکی گەورە لە ناوچەی پیشەسازیی سلێمانی دەکەوێتەوە

کوردستان
2024-10-14

شەیری بکە لە:

ئاگرێکی گەورە لە ناوچەی پیشەسازیی سلێمانی دەکەوێتەوە

دیمەنێک لە ئاگرە گەورەکەی ناوچەی پیشەسازی سلێمانی

ئاڤا نیوز

ئاگرێکی گەورە لە ناوچەی پیشەسازی سلێمانی کەوتووەتەوە و هەشت تیمی ئاگرکوژێنەوە سەرقاڵی کۆنترۆڵکردنی ئاگرەکەن.

چیرۆکی سەرەکی: لە ناوچەی پیشەسازی سلێمانی کە دەکەوێتە ناوەڕاستی شارەکە، ئاگرێکی گەورە کەوتووەتەوە و تاوەکو ئێستا کۆنترۆڵ نەکراوە، ئاگرەکە بەرەبەرە تەشەنە دەکات و خەریکە لە کۆنترۆڵ دەردەچێت.

لە پەیامنێرەوە: ژیوار عەبدولرەحمان، پەیامنێری ئاڤا لە سلێمانی ڕایگەیاند، ئاگرەکە سەرەتا لە کۆگایەکی مۆبیلیات کەتووەتەوە و دواتر بۆ کارگەیەکی ئاو تەشەنەی کردووە و ئێستاش هێندە فراوان بووە لە کۆنترۆڵ دەرچووە، لەکاتێکدا تیمەکانی ئاگرکوژێنەوە لەلایەک کۆنترۆڵی دەکەن، لەلایەکی دیکە سەرهەڵدەداتەوە، بەشێک لە سەقفی کارگەکەش ڕووخاوە.

هۆکارە زانراوەکان: یەکێک لە شایەتحاڵەکان لە شوێنی ڕووداوەکە گوتی ئاگرەکە سەرەتا لە کارگەیەکی ئاو دەستیپێکردووە، هۆکارەکەیشی سەتا سەت شۆرتی کارەبایە، بەڵام هیچ لێدوانێکی فەرمی نییە.

زیانە سەرەکییەکان: ئاگرەکە زیانێکی زۆری ماددی لێکەوتووەتەوە. لەبارەی برینداربوون و گیانلەدەستدانیش شایەتحاڵێک بە ئاڤای گوت هیچ زیانێکی گیانی نییە.

ئەوەی پێشبینی دەکرێت: مەترسی هەیە بەشێک لە کەلوپەلی نێو کارگەکان بتەقێتەوە، بۆیە هۆشداریی بە خەڵک دراوە لە شوێنەکە دووربکەونەوە. هەروەها مەترسی هەیە زیاتر تەشەنە بکات، کارگەیەکی غاز دەکەوێتە نیزک شوێنی ئاگرەکە، هەموو هەوڵی تیمەکانی بەرگریی شارستانی بۆ ئەوەیە ئاگرەکە نەگاتە ئەو کارگەیە.

لەلایەکی دیکەوە: بەڕێوەبەرایەتیی بەرگریی شارستانی سلێمانی هێلیکۆپتەری هەستاندووە، چەندجارێک بەسەر شوێنی ئاگرکەوتنەوەکە سووڕایەوە و هەڵسەنگداندنی بۆ دۆخەکە کرد.