ئاگرە گەورەکەی سلێمانی دوای 10 کاتژمێر کۆنترۆڵ کرا

ئاڤا نیوز

دوای 10 کاتژمێر ئاگرە گەورەکەی ناوچەی پیشەسازیی سلێمانی کۆنترۆڵ کرا، زیانی ئاگرەکە بە زیاتر لە یەک ملیۆن دۆلار دەخەملێنرێت، هیچ زیانێکی گیانیش نەبووە.

 

چیرۆکی سەرەکی: دوای ئاگرێکی گەورە لە کارگەیەکی کەرستەی کەلوپەلی پلاستیکی لە ناوچەی پیشەسازی سلێمانی کەوتەوە و دواتر بۆ کۆگایەکی کەرستەی ئاو تەشەنەی کرد و  لە کۆنترۆڵ دەرچوو، تیمەکانی ئاگر کوژێنەوە هەر زوو  گەیشتنە شوێنەکە، بۆئەوەی کۆنترڵی بکەن.

 

زانیاریی زیاتر: بەگوێرەی زانیارییەکانی پەیامنێری ئاڤا، باس لە دوو هۆکار دەکرێ لە بارەی  کەوتنەوەی ئاگرەکە، هۆکاری یەکەم باس لەوەدەکرێت کە هەوڵدراوە لا دیوراێکی کۆگای ئاوی سلێمانی ئیزوگام بکرێت ئەمەش بووتە هۆی گڕگرتنی ئەو کۆگایە، هۆکارێکی تریش هەیە باس لەوە دەکات بەهۆی شۆرتی کارەباوە بووە، هەر بە گوێرەی زانیارییەکان ئەو دوو کۆگایەی گڕیان گرتبوو بەتەنیشتیەکەوەن و یەکێکیان بە تەواوی سووتاوە.

 

زیانە سەرەکییەکان: ئاگرەکە زیانێکی زۆری ماددی لێکەوتووەتەوە، چوونکە یەکێک لەو کۆگایانەی سووتاوە کارگەی دروستکردنی مۆبیلیاتە. لەبارەی برینداربوون و گیانلەدەستدانیش شایەتحاڵێک بە ئاڤای گوت هیچ زیانێکی گیانی نییە.

 

ژمارەکان وادەڵێن: زیاتر لە هەشت تیمی بەرگری شارستانی لە هەوڵی کۆنتڕۆڵکردنی ئاگرەکەدابوون، زیاتر لە حەوت کۆگای مۆبیلیات و ساردەمەنی و ئاوی سلێمانی و کەرستەی پلاستیکی سووتاون، بەگوێرەی خەمڵاندنە سەرەتاییەکان زیانەکانی بە زیاتر لە یەک ملیۆن دۆلار مەزندە دەکرێت.