سەرۆکوەزیران: بەنداوی گۆمەسپان دەبێتە هۆکارێکی زۆر باش بۆ پەرەپێدانی کەرتی گەشتیاری

ئاڤا نیوز 

 

سەرۆکوەزیران مەسرور بارزانی، لە ڕێوڕەسمێکدا بەنداوی گۆمەسپان لە سنووری پارێزگای هەولێر کردەوە کە سێیەم گەورەترین بەنداوە لەسەر ئاستی هەرێمی کوردستان و توانای گلدانەوەی 97 ملیار مەتر سێجا ئاوی هەیە.

 

وێنە گەورەکە: بەنداوی گۆمەسپان کاریگەری دەبێت لەسەر پاراستنی سامانی ئاو، بەرزکردنەوەی ئاستی ئاوی ژێرزەوی و کەمکردنەوەی کاریگەرییەکانی دروستبوونی لافاو و بووژانەوەی کەرتەکانی گەشتیاری و کشتوکاڵی لە ناوچەکە.

 

لێدوانی فەرمی: سەرۆکوەزیران مەسرور بارزانی، لە کاتی کردنەوەی پڕۆژەکە وتارێکی پێشکەش کرد و گوتی، "ئاوی ئەم بەنداوە ئاوی بارانە و پێشتر بەفیڕۆ دەڕۆیشت، لەمەوبەدوا دەبێتە هۆکارێکی زۆرباش بۆ ڕووبەڕووبوونەوەی گۆڕانکاری ئاو و هەوا و بووژانەوەی کەرتی گەشتیاریی لە ناوچەکە".

 

زانیاریی زیاتر: لە بەشێکی دیکەی گوتەکانیدا سەرۆکوەزیران بارزانی تیشکی خستەسەر ئەوەی، کە ئەو بەنداوە ناوچەکە لەڕووی کشتوکاڵی و سامانی ماسی دەبووژێنێتەوە.