بەردی بناغەی جووتسایدی بەردەڕەش – کەڵەک دادەنرێت

ئاڤا نیوز

سەرۆکوەزیران مەسرور بارزانی بەردی بناغەی پڕۆژەی جووتسایدی قەزای بەردەڕەش - کەڵەک دادەنێت، کە ڕێگایەکی گرنگی بازرگانی نێوان هەرێمی کوردستان و تورکیایە.

وێنە گەورەکە: پێشنیوەڕۆی ئەمڕۆ پێنجشەممە سەرۆکوەزیران مەسرور بارزانی دەچێتە قەزای بەردەڕەش و بەردی بناغەی جووتسایدی قەزاکە بۆ کەڵەک دادەنێت، درێژی ڕێگاکە 35 کیلۆمەترە و لەلایەن دوو کۆمپانیاوە جێبەجێ دەکرێت.

زانیاریی زیاتر: ڕێگاکە شارەکانی دهۆک و نەینەوا بە هەولێر دەبەستێتەوە، ڕێگایەکی نێودەوڵەتیی بازرگانییە لە نێوان هەرێمی کوردستان و تورکیا،  گوژمەی 98 ملیار دیناری بۆ تەرخان کراوە و لە ماوەی سێ ساڵدا تەواو دەبێت.

بۆچی گرنگە: ڕێگای بەردەڕەش - کەڵەک یەکێکە لە ڕێگە مەترسیدارەکان بۆ ڕووداوەکانی هاتووچۆ، بەجووتسایدکردنی ڕووداوەکان و قەرەباڵخی بەشێوەیەکی بەرچاو کەم دەکاتەوە، جگە لەوە کارئاسانی بۆ جووتیارانی ناوچەکە دەکات، تاوەکو بەئاسانترین شێوە بەرهەمەکانیان بگەیێننە بازاڕەکان.