بە کشانەوەی کۆمەڵ پارتی دوو کورسی و یەکێتی کورسییەک زیاد دەکەن

ئاڤا نیوز

 

کۆمەڵی دادگەری بەهۆی هێنانی دەنگ و کورسی کەم لە هەڵبژاردنی ئەمجارە،  نەک بەشداری لە حکومەت ناکات، لە گفتوگۆ و ڕاوێژدایە نەچێتە پەرلەمانیش و کاندیدەکانی بکشێنێتەوە.

 

وێنە گەورەکە: کۆمەڵی دادگەری لە هەڵبژاردنی ئەمجارە بەراورد بە هەڵبژاردنی ساڵی 2018، چوار کورسی کەمی کردووە و لە حەوت کورسییەوە بۆ سێ کورسی دابەزیوە، ئەمەش حیزبەکەی تووشی شۆک کردووە.

 

چیرۆکی سەرەکی: لە ئەگەری کشانەوە و نەچوونی سێ کاندیدە دەرچووەکەی کۆمەڵ بۆ پەرلەمان، پێویستە شوێنیان بە سێ کاندیدی دیکە پڕبکرێتەوە، پرسیارە سەرەکییەکە ئەوەیە کێ شوێنیان دەگرێتەوە و کورسییەکان بۆ کام لایەن دەبن؟

 

لێکدانەوەی تایبەت: کۆمەڵ خاوەنی سێ کورسییە، کورسییەک لە بازنەی هەولێر و دوو کورسی لە بازنەی سلێمانی، بەپێی لێکدانەوەی ژووری هەڵبژاردنی ئاڤا میدیا، ئەگەر دوای ڕاگەیاندنی ئەنجامی کۆتایی دەنگی لایەنەکان گۆڕانکاریی زۆری بەسەردا نەیەت، دوو کورسی بۆ پارتی، کورسییەک بۆ یەکێتی دەبێت، کورسییەکانی پارتی دەبنە 41 و یەکێتی 24.

 

گۆرانکارییەکە بەمشێوەیە: ژمارەی کورسییەکانی پارتی لە هەولێر لە 17 ەوە دەبێتە 18، لەم کاتەدا مەرجە پارتی کاندیدێکی ئافرەت سەربخات، کاندیدەکەش جوان محەممەد عەلی دەبێت کە 3 هەزار  و 451 دەنگی هێناوە، بەم هۆیەوە کاندیدە دەرچووەکەی ڕەوتی هەڵوێست کە پێشتر مەرج بوو ئافرەت بێت و بەر سارا موحسین کەوتبوو کە تەنیا 332 دەنگی هێنابوو، ئەمجارە بۆ ئیبراهیم عەباس دەبێت کە 5 هەزار و 6 دەنگی هێناوە و سەرۆکی لیستەکە بوو.

 

زانیاریی زیاتر: لە سلێمانی کورسییەکی کۆمەڵ بەر یەکێتی دەکەوێت و بۆ کاندیدێکی پیاو دەبێت بە ناوی ڕێژان بورهان ئەحمەد کە 5 هەزار و 697 دەنگی هێناوە، کورسییەکەی دیکەی بۆ پارتی دەبێت، بەناوی سۆران خەلەف ئیبراهیم دەبێت، کە 1796 دەنگی بەدەستهێناوە. 

 

لەلایەکی دیکەوە: دوای مانگێک لە سوێندخواردنی پەرلەمانتاران، ئەگەر سێ کاندیدە دەرچووەکەی کۆمەڵ سوێندی یاسایی نەخۆن، سەرۆکایەتیی پەرلەمان داوا لە کۆمیسیۆن دەکات سێ کاندیدی دیکە بەپێی ڕێکارەکان شوێنیان بگرنەوە و ناوەکانیان ئاراستە بکەن.

باکگراوند: ئەنجوومەنی باڵای کۆمەڵی دادگەری ڕۆژی پێنجشەممە 24-10-2024، پەیامێکی لەبارەی ئەنجامی بەرایی هەڵبژاردن بڵاوکردەوە و ڕایگەیاند: "زانیاریمان بەدەست گەیشتووە بەمەبەست و بەرنامە بۆ داڕێژراو، دەنگەکانمان یان پووچەڵ کراون یان بۆ لایەنی دیکە هەژمارکراون.