هەفتەی ئایندە تیروپشکی دابەشکردنی زەوی لە هەولێر دەستپێدەکات

ئاڤا نیوز

 

دوای ئامادەکارییە ئیدارییەکان تیروپشک بۆ بەشی یەکەمی ناوی ئەو فەرمانبەرانە دەکرێت، کە لەسنووری سەرۆکایەتی شارەوانی هەولێر سودمەند دەبن.

 

لێدوانی فەرمی: کارزان هادی، سەرۆکی شارەوانی هەولێر، بە ئاڤا نیوزی ڕاگەیاند: هەفتەی ئایندە تیروپشک بۆ ناوی بەشێک لەو فەرمانبەرانە دەکەین، کە لە سنووری شارەوانیمان زەوییان پێدەدرێت، قۆناغەکانی دیکەی تیروپشکیش دواتر دەستپێدەکەین.

 

زانیاریی زیاتر: زیاتر لە سێ هەزار فەرمانبەری سەرۆکایەتی شارەوانی هەولێر و زیاتر لە هەزار فەرمانبەری بەڕێوەبەرایەتی گشتیی کارەبا و وەزارەتی کار و کاروباری کۆمەڵایەتی لەسنووری سەرۆکایەتی شارەوانی هەولێر لە وەرگرتنی زەوی سودمەند دەبن.

 

زانیاریی بەدەستهاتوو: 80 هەزار پارچە زەوی لەسەر ڕێگای نێوان هەولێر-دهۆک لەپشت گەزنە ئامادەکراوە و دەدرێن بە فەرمانبەرانی سنووری سەرۆکایەتی شارەوانی هەولێر.

 

لەلایەکی دیکەوە: ئەو شوێنەی دابینکراوە دەکرێت بە یەکێک لە گەڕەکەکانی هەولێر، هەر کۆڵانێکی لە 12 مەتر کەمتر نییە، هەر فەرمانبەرێکیش 200 مەتر زەوی پێ دەدرێت.

 

ئەوەی پێویستە بیزانیت: تاوەکو ئێستا پێنج هەزار کارتی زەوی ئامادەکراوە، کوژاندنەوەی زەوییەکانیش کاری لەسەر کراوە، هاوکات زیاتر لە 50 هەزار زەوی نەخشەی کەرتی بۆ دانراوە.

 

ژمارەکان وادەڵێن: لەسنووری پارێزگای هەولێر نزیکەی 70 هەزار فەرمانبەر لە پێدانی زەوی سودمەند دەبن.