فڕۆکەخانەی نەجەف هەڕەشەی دەرکردن لە کارمەندانی دەکات

ئاڤا نیوز

دوای هەوڵی دەستدرێژیی دوو هاووڵاتیی پاکستانی بۆ سەر گەنجێکی عێراقی، بەڕێوبەرایەتیی فڕۆکەخانەی نێودەوڵەتی نەجەف لە گشتاندنێکدا کە ئاراستەی سەرجەم بەشەکانی کردووە، هۆشداری دەدات لەوەی خراپ ناوهێنانی فڕۆکەخانە لە تۆڕە کۆمەڵایەتییەکاندا سزاکەی دەرکردنە.

 

نووسراوی فەرمی: بەپێی نووسراوێکی فەرمی کە واژۆی حوسێن عەباس، بەڕێوەبەری فەرمانگەی سەرچاوە مرۆییەکانی فڕۆکەخانەی نێودەوڵەتیی نەجەفی لەسەرە، تێیدا هاتووە: "بەپێی ڕێنماییەکانی بەڕێوەبەری فڕۆکەخانە، هەر بەڵێندەرێک لە تۆڕە کۆمەڵایەتییەکان بە خراپ پۆستێک لەسەر فڕۆکەخانەی نێودەوڵەتی نەجەف یان بەڵێندەرانی فڕۆکەخانە بکات، دەستبەجێ گرێبەستەکەی هەڵدەوەشێنرێتەوە".

 

هۆکارە زانراوەکان: ئەو گشتاندنەی بەڕێوەبەرایەتیی فڕۆکانەخانە دوای ئەوە دێت کە دوێنێ هەواڵێک بڵاو بووەوە لەسەر ئەوەی گەنجێکی عێراقی لەلایەن دوو پاکستانییەوە هەوڵدراوە دەستدرێژیی بکرێتە سەر کە هەرسێکیان کارمەندی فڕۆکەخانەی نەجەفن.

 

ئەوەی لەوبارەیەوە دەگوترێت: سەرچاوەیەک بە ئاڤا نیوزی ڕاگەیاند: "دوو کرێکاری پاکستانی کە لە فڕۆکەخانەی نەجەف کاردەکەن هەوڵی ئەوەیان داوە دەستدرێژیی بکەنە سەر کارمەندێکی عێراقی، ئەویش لە فڕۆکەخانەکە کاردەکات".

 

زانیاریی زیاتر: بە گوتەی ئەو سەرچاوەیە، کەسێک بە ڕێکەوت درکی بەو بابەتە کردووە و ئەو گەنجەی لە دەست ئەو دوو پاکستانییە ڕزگارکردووە، ئێستا ئەو دوو کرێکارە پاکستانییە لەلایەن دەزگای هەواڵگری لە فڕۆکەخانە دەستگیرکراون و لەژێر لێکۆڵینەوەدان.