یەکێتی شاندێک بۆ دانوستانی پێکهێنانی حکومەت پێکدەهێنێت

ئاڤا نیوز

 

یەکێتیی نیشتمانیی کوردستان شاندێک بۆ دانوستاندن لەگەڵ لایەنەکان بۆ پێکهێنانی کابینەی نوێی حکومەت پێکدەهێنێت، گوتەبێژی حیزبەکە دەڵێت: "پرۆژەی خۆمان بۆ گفتوگۆ لەگەڵ لایەنەکان هەیە".

 

وێنە گەورەکە: یەکێتی لە هەڵبژاردنی پەرلەمانی کوردستان 23 کورسی هێناوە و هێزی دووەمە، لەکاتێکدا پارتی 39 کورسی هێناوە و بە 16 کورسی لەپێش یەکێتییەوەیە، چەند ڕۆژێکە وەکو براوەی هەڵبژاردن شاندێکی بۆ پێکهێنانی کابینەی دەیەم پێکهێناوە و سەردانی لایەنەکان دەکات. 

لێدوانی فەرمی: سەعدی ئەحمەد پیرە، گوتەبێژی یەکێتی بە میدیای حیزبەکەی ڕاگەیاندووە: شاندێکیان بە سەرپەرشتیی قوباد تاڵەبانی و چەند ئەندامێکی مەکتەبی سیاسی پێکهێناوە، بۆ ئەوەی سەردان و گفتوگۆ لەگەڵ لایەنە سیاسییەکان لەسەر پێکهێنانی حکومەت بکەن.

 

لەلایەکی دیکەوە: گوتەبێژی یەکێتی دەڵێت: "پرۆژەی تایبەتمان بۆ پێکهێنانی کابینەی نوێی حکومەت هەیە و لەگەڵ لایەنە سیاسییەکان لەوبارەیەوە گفتوگۆ دەکەن".