فەرەنسا داوا دەکات بە زووترین کات حکومەتی داهاتوو پێکبهێنرێت

 

 

سەرۆكوەزیران مەسرور بارزانی و پاتریك دۆرێك، باڵیۆزی فەڕەنسا لە عێراق كۆبوونەوە پرسی پێکهێنانی حکومەتی داهاتووی هەرێمی کوردستان و سەرژمێریان تاوتوێ کرد.

 

بڵاوكراوەی فەرمی: حكومەتی هەڕێمی كوردستان بڵاوی كردەوە: باڵیۆزی فەڕەنسا پیرۆزبایی سەرکەوتنی پرۆسەی هەڵبژاردن و ئەنجامەکانی لە سەرۆكوەزیران مەسرور بارزانی كرد، هەردوولا هاوڕابوون لەسەر گرنگیی پێکهێنانی حکومەتێکی یەکگرتوو و بەهێز لە زووترین کاتدا لە پێناو خزمەتکردنی هاووڵاتییانی هەرێمی کوردستان و ڕووبەڕووبوونەوەی گۆڕانکاریی و پێشهات و ئاڵنگارییەکانی ناوچەکە و جیهان. 

 

زانیاریی زیاتر: هەردوولا بیروڕایان لەبارەی کێشەکانی هەرێمی کوردستان و حکومەتی فیدراڵ ئاڵوگۆڕ کرد و جەختیان لە پێویستیی دابینکردنی شایستە دارایی و مافە دەستوورییەکانی هەرێمی کوردستان کردەوە.

 

لەلایەکی دیکەوە: لە بەشێکی دیکەی کۆبوونەوەدا، گفتوگۆ لەبارەی دوا ئامادەکارییەکانی تایبەت بە پرسی ئەنجامدانی سەرژمێریی گشتیی دانیشتووان لە عێراق کرا.

 

لەلایەكی دیكەوە: سەرۆكوەزیران مەسرور بارزانی دووپاتی كردەوە هەرێمی کوردستان پشتیووانی لە پرۆسەکە دەکات بۆ مەبەستی گەشەپێدان، بەڵام سەرنج و تێبینیشی لەسەر پرۆسەکە هەیە کە پێویستە بەلاڕێدا نەبرێت و بۆ مەبەستی سیاسی بەکار نەهێنرێت، هاوکات پرۆسەکە هیچ کاریگەرییەکی نەرێنیشی لەسەر جێبەجێکردنی ماددەی 140ی دەستوور و یەکلاکردنەوەی پرسی ناوچە کوردستانییەکانی دەرەوەی ئیدارەی حکومەتی هەرێمی کوردستان نەبێت.