ئەمریکا: سیاسەتی ناردنی چەک بۆ ئیسرائیل ناگۆڕین

ئاڤا نیوز

ئیدارەی جۆ بایدن، سەرۆکی ئەمریکا ڕایدەگەیێنێت، هیچ سنوورێک بۆ گواستنەوەی چەک بۆ ئیسرائیل دانانێن، بەڵام پێویستە ئیسرائیل ڕەچاوی یاسا نێودەوڵەتییەکان بکات.

ڕاگەیێنراوی فەرمی: ڤێدات باتیل، یاریدەدەری وتەبێژی وەزارەتی دەرەوەی ئەمریکا ڕایگەیاند: ''پێشکەوتنی باشمان بەدەستهێناوە و دەبێت گواستنەوەی چەک بەردەوام بێت، بەڵام تا ئێستا هەڵسەنگاندنمان بۆ ئیسرائیل نەکردووە کە ئایا یاسا ئەمریکییەکان پێشێل دەکات یاخود چۆن چەکی ئەمریکا بەکاردەهێنێت؟''. 

زانیاریی بەدەستهاتوو: ئەنتۆنی بلینکن، وەزیری دەرەوەی ئەمریکا لەگەڵ ڕۆن دێرمەر، وەزیری کاروباری ستراتیژی ئیسرائیل کۆبووەتەوە و جەختی  لە پێویستی باشترکردنی دۆخی مرۆیی غەززە  لە ڕۆژانی داهاتوودا کردووەتەوە.

 

لەلایەکی دیکەوە: لیندا تۆماس گرینفیڵد، نوێنەری ئەمریکا لە نەتەوەیەکگرتووەکان جەخت لەوە دەکاتەوە نابێت ئیسرائیل سیاسەتی زۆرەملێ یان برسێتی لە غەززە پەیڕەو بکات. 

ئەوەی لەبارەیەوە دەگوترێت: ئەو وڵاتانەی چەکی ئەمریکی وەردەگرن پێویستە پابەندی یاسا مرۆیی و نێودەوڵەتییەکان بن و نابێت ڕێگری لە دابینکردنی هاوکاری مرۆیی بکەن.