ئۆکراینا بۆی هەیە بە مووشەکی ئەمریکا قووڵاییەکانی خاکی ڕووسیا بکاتە ئامانج

ئاڤا نیوز

 

ئیدارەی جۆ بایدن، سەرۆکی ئەمریکا، ڕێگەی بە ئۆکراینا دا تاوەکو لە شەڕی دژ بە ڕووسیا دا مووشەکی دوورمەودای درووستکراوی ئەمریکا بۆ پێکانی ئامانجەکانی لە ناو خاکی ڕووسیا بەکار ببات.

 

ئەوەی پێویستە بیزانیت: مووشەکەکان لە جۆری (ATACMS)ـن و دوای هەڵکردنی گڵۆپی سەوزی ئەمریکا، ئۆکراینا دەتوانێت نزیکەی 250 ئامانجی گرنگ لە ناو خاکی ڕووسیا بپێکێت؛ لەوانە 17 پێگەی هێزی ئاسمانیی ڕووسیا، بەڵام ڕووسیا پێشتر بەشی زۆری فڕۆکە و توانا سەربازییەکانی بۆ شوێنانی دوورتر لە دەستگەیشتنی مووشەکە دوورمەوداکان گواستوونەتەوە. 

 

ATACMS مووشکی بالیستیی درێژمەودایە، خێراییەکەی لە خێرایی دەنگ زیاترە، بە سووتەمەنی ڕەق کار دەکات، دەتوانێت 300 کیلۆمەتر ببڕێت، درێژیی مووشەکەکە چوار مەترە، کێشی 1670 کیلۆگرامە، ساڵی 1986 دیزاین کراوە و لە 1991ـەوە بەکار دەبرێت.

 

لەلایەکی دیکەوە: کرێملین، کۆشکی سەرۆکایەتیی ڕووسیا، لە کاردانەوەیەکدا ڕەخنەی لە بڕیارەکەی ئەمریکا گرت و گوتی ئەم بڕیارە نەوت بە ئاگری شەڕەکەدا دەکات و هاوکات گرژییەکانی نێوان ڕووسیا و ئەمریکاش دەباتە قۆناغێکی نوێ. 

 

لێدوانی فەرمی: لە ناوخۆی ئەمریکاش، دۆناڵد ترەمپ جونیەر، کوڕە گەورەی دۆناڵد ترەمپی سەرۆکی هەڵبژێردراوی ئەمریکا، ڕەخنەی لە بڕیارەکە گرت و گوتی، بایدن دەیەوێت بەر لە دەستبەکاربوونی ترەمپ جەنگی جیهانیی سێیەم هەڵگیرسێنێت.

 

زانیاریی زیاتر: هێشتا ئۆکراینا سوودی لەم ڕێگەپێدانەی ئەمریکا وەرنەگرتووە و مووشەکەکانی بۆ بەئامانجگرتنی ئامانجەکان لە قوولایی خاکی ڕووسیا بەکار نەبردوون، هاوکات ڕووسیا بەڵێنی داوە لە ئەگەری بەکاربردنیان وەڵامێکی گونجاوی بۆ ئۆکراینا دەبێت.