بڕیارێکی نوێ لە وەزارەتی پەروەردە لەبارەی دامەزراندنی وانەبێژان

ئاڤا نیوز

وەزیری پەروەردەی هەرێمی کوردستان دوایین هۆشداری بە مامۆستایانی وانەبێژ دەدات لەبارەی دامەزراندنیان و دەڵێت، دەستبەکار نەبن خەڵکی دیکە لە شوێنیان دادەنرێت.

وێنە گەورەکە: ئەمساڵ نزیکەی 38 هەزار وانەبێژ بە بڕیاری سەرۆکوەزیران مەسرور بارزانی بە گرێبەست دامەزران، دوای بڕیارەکە وانەبێژانی دابڕاو کە ژمارەیان زیاتر لە دوو هەزار و 500 کەسە، چەند جارێک لە ڕێگەی ئاڤاوە داوایان کرد دەنگیان بگەیێنرێت بۆ ئەوەی دامەزراندن  ئەوانیش بگرێتەوە.

ئەوەی پێویستە بیزانیت: زیاتر لە 20 ڕۆژە ڕێکارەکانی خۆتۆمارکردن لە بایۆمەتری بۆ مامۆستایانی گرێبەست دەستی پێکردووە و لەو ماوەیەدا مامۆستایان پرۆسەی بایۆمەتری دەکەن و لەنێو داتابەیسی پەروەردەی شار و شارۆچکەکاندا تۆمار دەکرێن، بەڵام دوو هەزار و 453 کەس لەو وانەبێژانەی فەرمانی دامەزراندنیان بۆ دەرچووە، دەستیان بە مامەڵەی دامەزراندن نەکردووە. 

لێدوانی فەرمی: د. ئالان حەمە سەعید، وەزیری پەروەردەی هەرێمی کوردستان بە ئاڤا نیوزی گوت: "ئەو وانەبێژانەی فەرمانی بەگرێبەستبوونیان بۆ دەرکراوە، بەڵام بە هۆکاری جیاواز دابڕاون یان وازیان لە دەوام هێناوە، ئەگەر نەگەڕێنەوە سەر ئەرکەکەیان، ئەوا لە شوێنی ئەوان وانەبێژانی دابڕاو دەستبەکار دەبن و گرێبەستیان بۆ دەکرێت".