کارکردن لە ڕێگای دووسایدی هەولێر-کۆیە دەستپێدەکات

ئاڤا نیوز

 

ڕێکارە هونەرییەکانی بەدووسایدکردنی ڕێگای هەولێر-کۆیە تەواوبووە و هێندەی نەماوە شۆفڵ و ئامێرەکانی دروستکردنی شەقام لە ڕێگاکەدا دەستبەکارکردن بکەن، ڕێکارە یاساییەکانیش زۆری نەماوە تەواوبکرێن.

 

وێنە گەورەکە: ماوەی 14 ساڵە بەردی بناغەی پرۆژەی بەدووسایدکردنی ڕێگای نێوان هەولێر-کۆیە دانراوە بەڵام نەتوانرا تەواو بکرێت، کابینەی نۆیەم بڕیاریدا پرۆژەکە تەواو بکات و هەنگاوە کردارییەکانیش دەستیپێکردووە.

 

لێدوانی فەرمی: د.ئاگرین عەبدوڵڵا، بریکاری وەزارەتی ئاوەدانکردنەوە و نیشتەجێکردنی حکومەتی هەرێمی کوردستان بە ئاڤا میدیای ڕاگەیاند، ڕێکارە هونەرییەکان لەگەڵ "کۆمپانیای ئازوان" کە جێبەجێکاری پڕۆژەکەیە تەواوکراوە، چەند هەنگاوێکی کەمی ڕێکاری یاساییش ماوە و لە ماوەیەکی نزیکدا پرۆژەی بەدووسایدکردنی ڕێگای نێوان هەولێر-کۆیە دەستپێدەکات.

 

ئەوەی پێویستە بیزانیت: ڕۆژی 25-09-2024 سەرۆکوەزیران مەسرور بارزانی، لەکاتی لێدانی زەنگی ساڵی نوێی خوێندن لە کۆیە، مژدەی بەدووسایدکردنی ڕێگای نێوان هەولێر-کۆیەی ڕاگەیاند، تەنیا دوو هەفتە دوای ئەو بەڵێنەش بەردی بناغەی پرۆژەکەی دانا.

 

باکگراوند: بەدووسایدکردنی ڕێگاکە، دووری نێوان هەولێر-کۆیە لە 52 کیلۆمەتر بۆ 46 کیلۆمەتر کەمدەکاتەوە و شۆفێران بە کەمتر لە نیو کاتژمێر لە هەولێرەوە دەگەن بە کۆیە، گوژمەی تێچووی پڕۆژەکەش 560 ملیار و 344 ملیۆن دینارە.