بە بڕیاری مەسرور بارزانی چەند پڕۆژەیەكی گرنگ لە هەڵەبجە جێبەجێ دەكرێن

ئاڤا نیوز

 

بە بڕیاری سەرۆکوەزیران مەسرور بارزانی، حکومەتی هەرێمی کوردستان دەست بە جێبەجێکردنی پاکێجێک پڕۆژەی ستراتیژیی تەندروستی لە پارێزگای هەڵەبجە دەکات، کە ئامانج لێی بەرزکردنەوەی ئاستی خزمەتگوزارییە پزیشکییەکانە بۆ دانیشتووانی ناوچەکە.

 

لێدوانی فەرمی؛ د. سامان بەرزنجی، وەزیری تەندروستیی هەرێمی کوردستان بە ئاڤای ڕاگەیاند، ئەنجوومەنی وەزیرانی هەرێمی كوردستان ڕەزامەندی داوە لەسەر خەرجكردنی 791 ملیۆن و 892 هەزار دینار لەسەر بودجەی وەزارەتی تەندروستی، بەمەبەستی دووبارە دروستكردنەوەی بنكەی تەندروستیی مۆردانە لە پارێزگای هەڵەبجە.

هاوكات؛ مەسرور بارزانی ڕەزامەندی داوە لەسەر  دروستكردنی باڵەخانەی نەخۆشخانەیەكی سەردەمیانە لە پارێزگای هەڵەبجە كە توانای  ئەنجامدانی چارەسەر و نەشتەرگەری لە ئاستێكی بەرزدا بێـت.

هەروەها؛ دابینكردنی ئامێری  پزیشكی بەمەبەستی چارەسەركردن و  شكاندنی  بەردی گورچیلە بۆ نەخۆشخانەی هەڵەبجە.

لەلایەکی دیکە؛ وەزیری تەندروستی دەشڵێت، ڕەزامەندی دراوە لەسەر پێكهێنانی بۆڕدێكی ڕاوێژكاریی تەندروستی بۆ پێشكەشكردنی خزمەتگوزاریی پزیشكی بۆ چارەسەركردنی بەپەلەی نەخۆشانی بەركەوتووی چەكی كیمیایی هەڵەبجە.