کوردستان فاوندەیشن پڕۆژەی ژینگەدۆستی بۆ 100 قوتابخانە ڕاگەیاند

ئاڤا نیوز

 

ژینگەدۆستی بۆ قوتابخانەکان، پڕۆژه‌یه‌كی نوێی پەروەردەیی و ژینگەیی كوردستان فاونده‌یشنه‌ و  100 قوتابخانە سوودمەند دەبن.

 

وێنە گەورەکە: کوردستان فاونده‌یشن، کە تۆڕێکی ڕێکخراوی ناحکومیی قازانج نەویستە، پڕۆژەی چاککردنی باخچە و ئاوی پاکی خواردنەوەی بۆ 100 قوتابخانەی حکومی لە ناوچە جیاجیاکانی هەرێمی کوردستان ڕاگەیاند. 

 
لێدوانی فەرمی: د. ئالان حەمەسەعید، وەزیری پەروەردەی حکومەتی هەرێمی کوردستان بە ئاڤا میدیای ڕاگەیاند، پڕۆژەی ژینگەدۆستی بۆ  قوتابخانەکان و چاککردنی باخچە و ئاوی پاکی خواردنەوە، دەبێتە هەنگاوێکی گرنگ و پاڵپشتیکار بۆ کەرتی پەروەردە لە هەرێمی کوردستان.

 

لەلایەکی دیکە: گوتیشی، کوردستان فاوندەیشن هاوکارێکی گرنگی کەرتی پەروەردە بووە لە پرۆسەی بە دیجیتاڵیکردن، ئەو ئەپلیکەیشنەی کە زیاتر لە یەک ملیۆن و 800 هەزار قوتابی لە قوتابخانە حکومییەکان نمرەی لێوەردەگرنەوە، کوردستان فاوندەیشن پاڵپشت بوو  لە بەگەڕخستن و بەڕێوەبردنەکەی.

 

زانیاریی زیاتر: ساکار عومەر، بەڕێوەبەری پەیوەندییە گشتییەکان لە کوردستان فاوندەیشن بە ئاڤا میدیای گوت، کوردستان فاوندەیشن لەڕێگەی پڕۆژەی ژینگەدۆستی بۆ قوتابخانەکان، بایەخ بە درەخت و چیمەنی باخچەی قوتابخانەکان دەدات، هەوڵدەدات ڕێژەی سەوزایی قوتابخانەکان بەرز بکاتەوە، فلتەری پاککردنەوە بۆ تانکیی ئاوی خواردنەوەی ئەو 100 قوتابخانەیە دادەنێت، ئەمەش سوود بە تەندروستی قوتابییەکان دەگەیێنێت و لە نەخۆشی بە دووریان دەکاتەوە.