پارێزگاری دهۆک: پێشانگای نێودەوڵەتیی کتێب لە زاخۆ پێشوازی زۆر باشی لێکراوە

ئاڤا نیوز

د. عەلی تەتەر، پارێزگاری دهۆك، یەکەم پێشانگای نێودەوڵەتیی کتێبی لە زاخۆ بەسەرکردەوە و لە لێدوانێکی ڕۆژنامەوانیدا گوتی، جێگەی دڵخۆشییە پێشانگاکە پێشوازی زۆرباشی لێکراوە و ژمارەیەکی زۆر کتێب فرۆشراون.

چیرۆکی سەرەکی: ڕۆژی یەکشەممەی ڕابردوو، 30-11-2025، سەرۆک بارزانی یەکەمین پێشانگای نێودەوڵەتیی کتێب لە زاخۆ بە ناونیشانی "زاخۆ دەخوێنێتەوە"  کردەوە، پێشانگاکە زیاتر لە 20 هەزار ناونیشانی کتێب لەخۆدەگرێت، 50 دەزگای چاپ و بڵاوکردنەوەی ناوخۆیی و بیانی لە 10 وڵات، بەشداریی پێشانگاکەیان کردووە.

لێدوانی فەرمی: د. عەلی تەتەر، پارێزگاری دهۆك، لە لێدوانێکی ڕۆژنامەوانیدا، گوتی: جێگەی دڵخۆشییە کە پێشانگای نێودەوڵەتی کتێب لە زاخۆ پێشوازی گەرمی لێکراوە و خەڵکێکی زۆر سەردانی دەکەن و ژمارەیەکی زۆر کتێب فرۆشراون، ئەمەش نیشانەیەکی ئەرێنییە بۆ زۆری خوێنەرانی کتێب.

- داوا لە نووسەرانی کورد دەکەین، کتێبی کوردی زیاتر لە بواری جیاواز بنووسن، لە پێناو ئەوەی سەرچاوەی زیاتری زانستییمان بە زمانی کوردی هەبێت.

- ژمارەیەکی باشی وەرگێری کورد هەن کتێبی زمانەکانی دیکە وەردەگێڕنە سەر دیالێکتە جیاوازەکانی زمانی کوردی.

- ئومید دەکەین ساڵانە لە هەموو شارەکانی کوردستان پێشانگای نێودەوڵەتیی کتێب بکرێنەوە.

بە تەنیشت ئەم بابەتەوە: گۆهدار شێخۆ، سەرپەرشتیاری ئیدارەی سەربەخۆی زاخۆ، لە لێدوانێکی ڕۆژنامەوانیدا، گوتی، ڕۆژێکی مێژووی بوو کە سەرۆک بارزانی یەکەم پێشانگای نێودەوڵەتیی کتێبی لە زاخۆ کردەوە، جێگەی دڵخۆشییە، ژمارەیەکی زۆر کتێب دەفرۆشرێن و پێشوازی گەرم لە پێشانگاکە کراوە.