دیاردەی جگەرەکێشان لە نێو خانمانی عێراق سنووری عەیبەی کۆمەڵایەتی تێدەپەڕێنێت

ئاڤا نیوز

لە ماوەی چەند ساڵی ڕابردوودا، دیمەنی جگەرەکێشان لەنێو ژنانی عێراق ڕووی لە هەڵکشانێکی بەرچاو کردووە، ئەمەش وەک گۆڕانکارییەکی کۆمەڵایەتی دەردەکەوێت،  کە جاران جگەرەکێشانی ژنانیان بە عەیبە و نەگونجاو دەزانی.

وێنە گەورەکە: جیاواز لەساڵانی ڕابردوو، ئێستا لە شەقام، کافێی، فەرمانگە حکومییەکان و ئۆتۆمبێلە تایبەتەکاندا، بینینی ژنان و کچان کە جگەرەی ئاسایی یان ئەلیکترۆنی (ڤەیپ) دەکێشن، بووەتە دیمەنێکی ئاسایی.

لێدوانی فەرمی: باسم غەراوی، بەرپرس لە وەزارەتی تەندروستی عێراق ڕایگەیاند: بە نیگەرانییەوە چاودێری ئەم گۆڕانکارییە دەکەین، بەتایبەت لەگەڵ دەرکەوتنی نیشانەکانی بڵاوبوونەوەی جگەرەکێشان لەنێو تەمەنە بچووکەکاندا، لەوانەش خوێندکارانی زانکۆ و قوتابیانی ئامادەیی و فەرمانبەران.

زانیاریی زیاتر: بە وتەی ئەو بەرپرسە، کێشەکە تەنیا لە خودی جگەرەکێشانەکەدا نییە، بەڵکو مەترسی گەورەی بۆ سەر تەندروستی ژنان هەیە، بەتایبەت بۆ کۆئەندامی هەناسە و دڵ، ئەمەش جگە لە کاریگەرییە مەترسیدارەکانی لەسەر دووگیانی و منداڵبوون.

ئەمەش بزانە: بەپێی ئاماری حکومەتی عێراق، ڕێژەی جگەرەکێشان لە عێراق بە نزیکەی 35٪ دەخەمڵێنرێت و ڕۆژانە هاووڵاتیانی عێراق نزیکەی دوو ملیۆن دۆلار بۆ کڕینی تووتن و جگەرە خەرج دەکەن.