ئەوروپا ڕاهێنان بە فەرمانبەران و هێزەکانی ئاسایشی وەزارەتی ناوخۆی کوردستان دەکات

ئاڤا نیوز

 

سەنتەری تەکنەلۆجیا و ڕاهێنانی ئەوروپی (ETTC) لەسەر داوای وەزارەتی ناوخۆی کوردستان و بەمەبەستی بەرزکردنەوە و پێشخستنی تواناکانیان، ڕاهێنان بە فەرمانبەران و کارمەندانی هێزەکانی ئاسایشی ناوخۆ دەکات.

 

چیرۆکی سەرەکی: ئەمڕۆ سێشەممە 14-10-2025، شاندێکی سەنتەری تەکنەلۆجیا و ڕاهێنانی ئەوروپی ETTC سەردانی وەزارەتی ناوخۆی هەرێمی کوردستانیان کرد کە پێکهاتبوون لە دێرک جانکۆڤسکی و کارین کۆچەر، هاوسەرۆکانی سەنتەری تەکنەلۆجیا و ڕاهێنانی ئەوروپی ETTC و تیمێکی باڵای سەنتەرەکە.

 

ڕاگەیێنراوی فەرمی: وەزارەتی ناوخۆ ڕایگەیاند، شاندی ناوبراو لەگەڵ هێمن میرانی، بەڕێوەبەری گشتیی دیوان لە وەزارەتی ناوخۆ کۆبووەوە. لە دیدارەکەدا، بەڕێوەبەری گشتیی دیوان وێڕای بەخێرهێنانی شاندی میوان، سوپاس و پێزانینی وەزارەتی ناوخۆی بە سەنتەری ناوبراو گەیاند لە بەرامبەر ئەنجامدانی کار و چالاکییەکانییان و خولی ڕاهێنان لە بوارە جیاوازەکان بۆ فەرمانبەران و ئەفسەران و کارمەندانی وەزارەتی ناوخۆ بەمەبەستی بەرزکردنەوە و پێشخستنی تواناکانیان، هەروەها پرۆژەکانی دیکەیان لەگەڵ ناوەندی هاوبەشی هەماهەنگی قەیرانەکان و دامەزراوەی دیکەی وەزارەت.

 

لەلایەکی دیکەوە: شاندی میوان خۆشحاڵی خۆیان دەربڕی لە بەرامبەر کارکردن لە هەرێمی کوردستان و هەبوونی هەماهەنگی تەواو لە نێوان سەنتەرەکەیان و دامودەزگاکانی حکومەتی هەرێمی کوردستان. پێزانینیشیان هەبوو بۆ ئەم پێشکەوتنە فراوانەی کە هەرێمی کوردستان لەسەرجەم بوارەکاندا بەخۆوەی بینیووە.

 

شاندەکە خوازیاری ئەوەبوون کە هەماهەنگی و پەیوەندییەکانیان لەگەڵ وەزارەتی ناوخۆ زیاتر فراوان بکەن بۆ ئەنجامدانی خول و ڕاهێنانی زیاتر بۆ فەرمانبەران ئەفسەران و کارمەندانی هێزەکانی ئاسایشی ناوخۆ و، پێشکەشکردنی خزمەتگوزاری دیکە لەسەر داوای وەزارەت و دامەزراوەکانی سەر بە وەزارەتی ناوخۆ.