لە كۆڵۆمبیا 14 تۆن ماددەی هۆشبەر دەستی بەسەر دا دەگیرێت

ئاڤا نیوز 

 

لە ئۆپەراسیۆنێكی هاوبەشدا به‌ به‌شداریی ده‌یان وڵات، هێزی ده‌ریایی كۆلۆمبیا ده‌ست دەگرێت به‌سه‌ر 14 تۆن ماددەی هۆشبەر كه‌ مەزەندە دەكرێت نرخەكەی هەشت ملیار و 400 ملیۆن دۆلار بێت.

 

وێنە گەورەكە: لە چوارچێوەی هەوڵەكانی نووسینگەی نەتەوە یەكگرتووەكان بۆ بەرەنگاربوونەوەی ماددەی هۆشبەر و بەهەماهەنگی حكومەتی كۆڵۆمبیا، ئۆپه‌راسیۆنێكی فراوانی ده‌ریایی بە بەشداری 62 وڵات بۆ بەرەنگاربوونەوەی ماددەی هۆشبەر ئەنجامدرا، كە پرۆسەكە ماوەی 45 ڕۆژی خایاند، جگە لە دەستگیركردنی 434 تۆمەتباری بازرگانیكردن بە ماددەی هۆشبەر، توانرا ده‌ست به‌سه‌ر 14 تۆن ماددەی هۆشبەردا بگیرێت.

 

ڕاگەیێنراوی فەرمی: هێزی ده‌ریایی كۆلۆمبیا لەمبارەیەوە ڕاگەیێنراوێكی بڵاوكردەوە و تیایدا هاتووە، ئه‌و هه‌ڵمه‌ته‌ نێوده‌وڵه‌تییه‌ی دژ به‌ قاچاخبردنی ماددە هۆشبەرەكان، لەژێر ناوی "ستراتیژیه‌تی ئۆریۆنی فره‌ڕه‌گه‌زی" به‌ڕێوه‌چوو،‌ تیایدا ده‌ست به‌سه‌ر 14 تۆن ماددەی هۆشبەر لەجۆرەكانی: كۆكایین، ماریجوانا، تلیاك و میسامڤیتامین دا گیرا.

 

زانیاریی زیاتر: هەر لەو ئۆپەراسیۆنەدا ده‌ست به‌سه‌ر شه‌ش كه‌شتی گیراوه‌، یه‌كێك له‌و كه‌شتیانه‌ پێنج تۆن كۆكایینی باركردبوو، به‌ره‌و وڵاتی ئۆسترالیا ده‌چوو.

 

ژمارەكان وادەڵێن: ئەو هەڵمەتە فراوانە وایكردووە، تۆڕەكانی بازرگانیكردن بە ماددەی هۆشبەر بە بڕی 8 ملیار و 400 ملیۆن دۆلار زەرەر بكەن، 434 تۆمەتباری نێودەوڵەتیش دەستگیركراون و ڕادەستی 10 وڵات كراونەتەوە.