ئەمریکا لەبارەی ئێران دوو داواکاری لە بۆلیڤیا دەکات

ئاڤا نیوز

ئەمریکا هەوڵەکانی چڕکردووەتەوە بۆ ناچارکردنی حکومەتی بۆلیڤیا تاوەکو ئەو کەسانەی گومانی "سیخوڕی ئێرانیان" لێدەکرێت لە وڵاتەکەی دەربکات. هاوکات داوا لەو وڵاتە دەکرێت سوپای پاسدارانی ئێران وەک ڕێکخراوێکی تیرۆریستی بناسێنێت.

زانیاریی بەدەستهاتوو: بەپێی زانیارییەکانی دوو سەرچاوەی ئاگادار بۆ ئاژانسی ڕۆیتەرز، گوشارەکانی واشنتن تەنها سوپای پاسداران ناگرێتەوە، بەڵکو داوا لە بۆلیڤیا کراوە هەریەکە لە بزووتنەوەی حەماس و گرووپی حیزبوڵای لوبنانیش بخاتە لیستی تیرۆرەوە، کە ئەمریکا وەک بریکاری ئێران لە ناوچەکەدا دەیانبینێت.

هۆکارە زانراوەکان: ئەم جووڵە دیپلۆماسییە نهێنییەی ئەمریکا لە چوارچێوەی ستراتیژییەتێکی فراوانتردایە بۆ بەهێزکردنی کاریگەریی جیۆپۆلەتیکی ئەمریکا لە ئەمریکای لاتین و کەمکردنەوەی هەژموونی نەیارەکانی لەو ناوچەیەدا.

بۆچوونی لایەنی بەرامبەر: وەزارەتی دەرەوەی بۆلیڤیا لەبارەی ئەم داواکارییانەی ئەمریکا ڕایگەیاند: "تاوەکو ئێستا هەڵوێستێکی تەواو ڕوون و دیاریکراومان لەسەر ئەم پرسە نییە." لە بەرامبەردا، نێردەی ئێران لە نەتەوەیەکگرتووەکان ئامادە نەبووە هیچ لێدوانێک لەو بارەیەوە بدات.

ئەمەش بزانە: دوای دەستگیرکردنی نیکۆلاس مادۆرۆی سەرۆکی ڤەنزوێلا، ئەمریکا هەوڵەکانی بۆ تێکدانی پەیوەندییە ئابووری و ئەمنییەکانی نێوان کاراکاس و تاران زیاتر کردووە.