پەیامنێری ئاڤا: لە کۆبانێ ئاو و کارەبا و شیری منداڵان نەماوە

ئاڤا نیوز

تا دێت دۆخی کۆبانێ سەختتر دەبێت و مەترسی لەسەر سنوورەکە زیاتر دەبێت، پێداویستییە سەرەتاییەکان تەواو بوون و خەڵکی شارەکە و ئاوارەکان لە دۆخێکی سەختی مرۆیین. پەیامنێری ئاڤا لە کۆبانێ دەڵێت: هەشت ڕۆژە کۆبانێ بە تەواوی گەمارۆدراوە.

چیرۆکی سەرەکی: هەزاران خانەوادە لە كۆبانێ، ڕەققە و عەفرین ئاوارەی قامیشلۆ و عامودێ بوونە، ڕەوشێكی نالەباری مرۆیی دەگوزەرێنن و پێویستییەکی زۆریان بە هاوکارییە بە تایبەت کۆبانێ چونکە بەهۆی هەڵکەوتەی جوگرافیی و هێرشی سوپای عەرەبیی سووریا لە بەشەکانی دیکەی ڕۆژئاوای کوردستان دابڕاوە.

لێدوانی فەرمی: ڕەدوان بیزار، پەیامنێری ئاڤا، لە کۆبانی وتی: هەشت ڕۆژە کۆبانێ بە تەواوی گەمارۆدراوە، کارەبا و ئاو نیە، شیری منداڵان و دەرمان تەواو بووە، ڕەوشی تەندروستی و مرۆیی شارەکە لەوپەڕی خراپی دایە. 40 بۆ 45 هەزار ئاوارە لە ڕەقە و تەبقە و عەین عیسا و گوندەکانی دەوروبەری کۆبانێ ئاوارەبوون و هاتوونەتە ناو کۆبانێ، هەموویان چاوەڕیی ئەوەن هاوکاریی مرۆیی بەپەلە بەگەینرێتە شارەکە.

پەیامنێری ئاڤا، دەشڵێت: "زۆربەی پێداویستییەکان لە خۆراک و سووتەمەنی و دەرمان و شیری منداڵان تەواو بووە، لە هەموو کۆبانێ تەنیا یەک نانەواخانە کار دەکات و ئەویشیان خەریکە ئاردی یەدەگی تەواو دەبێت."

٠ دەرمان و پێداویستی پزیشكی تەواو بووە، ڕەوشی تەندروستی زۆر خراپە ئەمە لە کاتێکدایە ئێستا سێ بریندار هەن و پێویستییان بە چارەسەرییە.

٠ ئەوەی دۆخی خەڵکی زیاتر سەخت کردووە، مەترسی کۆمەڵکوژی و تاوانەکانی ئەو گرووپانەیە کە هێرش دەکات سەر کۆبانێ.

٠ خەڵک ترسیان لە دووبارەبوونەوەی کارەساتی 2014ـی هێرشی داعش بۆ سەر کۆبانێ هەیە، چونکە ئێستا کە ئاگربەست درێژکراوەتەوە هیشتا گرووپە چەکدارەکان هێرش دەکەن سەر گوندەکانی دەوروبەری کۆبانێ.

٠ هاتنی ئاوارەکان بۆ کۆبانێ و سەختتر بوونی دۆخی خەڵکی شارەکە و ئاوارەکان بەردەوامە.