قۆناغی دووەمی دابەشکردنی زەوی دەستپێدەکات

ئاڤا نیوز

 

وەزارەتی شارەوانی و گەشتوگوزار ئامادەکاری بۆ دەستپێکردنی قۆناغی دووەمی دابەشکردنی زەوی دەکات، تاوەکو ئێستا  فۆڕمی 65 بۆ 70 هەزار  فەرمانبەر و خانەنشینی دیکە لە وەزارەتی شارەوانی وردبینییان بۆ کراوە، لەم قۆناغەدا تەنیا لە هەولێر و سلێمانی تیروپشک بۆ نزیکەی 40 هەزار پارچە زەوی دەکرێت.

 

وێنە گەورەکە: بەشێکی وەزارەتەکان فۆڕم و زانیاریی فەرمانبەرانیان ناردووەتە وەزارەتی شارەوانی و گەشتوگوزار، ئێستا پرۆسەی وردبینی بەردوامە، ئەم هەفتەیە لیستی ناوەکان ئاراستەی ئەنجوومەنی وەزیران دەکرێت و چاوەڕوان دەکرێت لە ماوەی دوو ڕۆژدا ڕەزامەندی بدات، دواتر ناوەکان دەگەڕێنرێنەوە شارەوانییەکان و بەگوێرەی زەوی ئامادەکراو تیروپشک بۆ ناوەکان دەکرێت.

 

لێدوانی فەرمی: سەربەست مەولوود، بەڕێوەبەری بەشی یاسایی لە وەزارەتی شارەوانی بە ئاڤا میدیای گوت،  "بە ئەگەری زۆرەوە هەفتەی داهاتوو پرۆسەی تیروپشک بۆ دابەشکردنیان دەکرێت."

 

زانیاریی زیاتر: بۆ یەکەمجار لە هەردوو ئیدارەکانی سۆران و گەرمیان تیروپشک بۆ دابەشکردنی زەوی دەکرێت و زیاتر لە 10 هەزار پارچە زەوی دابەش دەکرێن.
 
ژمارەکان وادەڵێن: بەگوێرەی بەدواداچوونی ئاڤا، ژمارەی ئەو کەسانەی کە لە هەر ناوچەیەک لەم قۆناغەدا سوودمەند دەبن، بەمشێوەیە دەبێت:-

هەولێر: 15 بۆ 20 هەزار فەرمانبەر.
سلێمانی: 10 بۆ 12 هەزار فەرمانبەر.
دهۆک: هەشت بۆ 10 هەزار فەرمانبەر.
سۆران: شەش بۆ هەشت هەزار فەرمانبەر. 
ئیدارەی گەرمیان: چوار بۆ شەش هەزار فەرمانبەر.