مەراسیمێکی ڕێزلێنان بۆ هونەرمەند ناسر حەسەن ڕێكدەخرێت

ئاڤا نیوز

 

لە هەولێر مەراسیمی ڕێزلێنان لە "نیو سەدە خزمەتكردنی هونەرمەندی ناوداری كورد ناسڕ حەسەن" ڕێكدەخرێت.

 

وێنە گەورەكە: بەڕێوەبەرایەتیی هونەری سینەمای هەولێر بە پاڵپشتی پارێزگای هەولێر، ڕۆژی چوارشەممە 04-11-2024، چالاكییەكانی وەرزی زستانە لە چوارچێوەی پڕۆژەی "سینەما و جەماوەر" دەستپێدەكات و هەفتانە لە هۆڵی ئیمپایەر سینەما، فیلمی سینەمایی نمایش دەكرێت.

 

لێدوانی فەرمی: شاخەوان مستەفا، بەڕێوەبەری هونەری سینەمای هەولێر، تایبەت بە ئاڤا میدیا ڕایگەیاند، لەدەسپێكی وەرزی زستانەی چالاكییەكانی پڕۆژەی سینەما و جەماوەر، فیلمی سینەمایی 'سپی سپی' لە دەرهێنانی سامی كاكە نمایشدەكرێت، ئەوەش وەك ڕێزلێنانێك بۆ نیو سەدە خزمەتی هونەرمەندی ناوداری كورد، مامۆستا ناسڕ حەسەن.

زانیاریی زیاتر: هەر لەو مەراسیمەدا دەرهێنەر و ئەكتەری ناوداری كورد "ناسر حەسەن" لەلایەن پارێزگاری هەولێرەوە میدالیای ئاڵتوونی پێ دەبەخشرێت.

 

باكگراوند: ناسر حەسەن لە ساڵی 1972 وەك دەرهێنەر و ئەكتەر دەستی بەكاری سینەمایی كردووە و خاوەنی دەیان زنجیرە دراما و فیلمی سینەماییە  لە دیارترینیان: "ژاڵە، مەمی ئالان، ئەڵوەن و سیمای خۆڵەمێش".

لەلایەکی دیکەوە: هەروەها کاری دەرھێنانی بۆ دەیان کلیپی گۆرانیبێژە ناسراوەكانی كورد كردووە لەوانەش: "عەلی مەردان، محەممەد عارف جزیری، عوسمان شارباژێری".