هاوپەیمانی دەوڵەتی یاسا پێشنیازی کاندیدێکی "سازان" دەکات

ئاڤا نیوز

هاوپەیمانی دەوڵەتی یاسا، پێشنیازی کاندیدێکی "سازان" بۆ پێکهێنانی حکومەتی داهاتوو و سەرۆکایەتیکردنی دەکات و ئاماژە بەوەش دەکات کە ئەم پێشنیازە لە قۆناغی داهاتوودا لە واقیعەوە نزیکترە نەک ژمارەی دەنگەکان.

وێنە گەورەکە: ڕاستەوخۆ لە دوای ڕاگەیاندنی ئەنجامە بەراییەکانی هەڵبژاردنی خولی شەشەمی پەرلەمانی عێراق، جووڵە سیاسییەکان بۆ پێکهێنانی هاوپەیمانیێتی دەستیان پێکردووە.

لێدوانی فەرمی: عامر خوزاعی، سەرکردەی دیاری هاوپەیمانی دەوڵەتی یاسا بە میدیای عێراقی ڕاگەیاند "هەنگاوەکان لە پشتی پەردەوە بۆ هەڵبژاردنی حکومەت وەک دانوستانە سەرەتاییەکان دەستیان پێکردووە، لەوانەیە کارەکان بەرەو کاندیدێکی سازان بڕۆن و هەموو شتێک لە قۆناغی داهاتوودا کراوەیە".

شێوازی جێبەجێکردن: بەگوتەی خوزاعی بەدەستهێنانی پۆستی سەرۆکوەزیران "چیتر بە دەنگ دیاری ناکرێت، چونکە لە 2014ـەوە ئەوە پێوەر نەبووە، پێشبینی ناکەین زۆری دەنگ و کورسی ببێتە فاکتەرێکی یەکلاکەرەوە بێت بۆ بەدەستهێنانی پۆستی سەرۆکوەزیران لەلایەن هەر لایەنێکەوە."

لەلایەکی دیکەوە: خوزاعی دەڵێت: ئەم بابەتە "بەستراوەتەوە بە ڕێککەوتن و سازانی هێزەکانی چوارچێوەی هەماهەنگی". گفتوگۆکانی کوتلە سیاسییەکان بەردەوامە بۆ نەخشاندنی نەخشەڕێگای هاوپەیمانێتییەکانی داهاتوو کە ڕێگا خۆش دەکەن بۆ پێکهێنانی حکومەتێکی نوێ لە عێراقدا، بەهۆی نەبوونی براوەیەک کە بە جیاوازییەکی زۆر بتوانێت بە تەنیا حکومەت پێکبهێنێت.

ئەوەی پێشبینی دەکرێت: بڕیارە کۆمیسیۆنی باڵای هەڵبژاردنەکان سبەی دووشەممە ئەنجامی کۆتاییەکانی هەڵبژاردن ڕابگەیێنێت و ماوەی سێ ڕۆژیش بۆ وەرگرتنی تانە لە ئەنجامەکان دیاریکراوە.