گرووپی موزیکی ڕەسەنی نەتەوەکانی کەرکووک لە ئەمریکا چەند کۆنسێرتێک دەکەن

ئاڤا نیوز

گرووپی موزیکی ڕەسەنی نەتەوەکانی کەرکووک، لەسەر داوای کونسوڵخانەی عێراق، بانگھێشتی ئەمریکا کراون، ماوەی هەفتەیەکە لە واشنتن دیسین، بۆ پێشکەشکردنی بەرهەمە هونەرییەکانیان هەفتەیەکی  دیکەش دەمێننەوە.

چیرۆکی سەرەکی: گرووپی موزیکی ڕەسەنی نەتەوەکانی کەرکووک، دوای ئەوەی لە تۆڕە کۆمەڵایەتییەکان کورتە ڤیدپۆیەکی خۆیان بڵاوکردەوە، بەهۆیەوە لە ڕێگەی کونسوڵخانەی عێراق، بانگھێشتی ئەمریکا کران ئێستا لەوێ سەرقاڵی پێشکەشکردنی کارە هونەرییەکانیانن.

لێدوانی فەرمی: عومەر مۆفەق، سەرپەرشتیاری گرووپەکە، بە ئاڤای گووت، لە ماوەی هەفتەیەکدا دوو کۆنسێرت و لایڤ موزیکێکمان پێشکەشکردووە. لەو کۆنسێرتانە باڵیۆزی وڵاتانی عەرەبی، بەریتانیا و بەشێک لە کۆنگرێسمانەکانی ئەمریکا ئامادەی بوون. لەلایەن ئامادەبووانەوە پێشوازییەکی گەرم لە کارەکانمان دەکرێت و بە کارەکانمان سەرسامن و هەفتەیەکی دیکەش بەردەوام دەبین. ئەو پەیامە دەگەیەنین لە هەرێمی کوردستان پێکەوەژیان لە چ ئاستێکدایە و کورد لە نێوان نەتەوەکان جیاوازی ناکات و ئەمە وێڕای پیشاندانی بەرهەمە هونەرییەکانی کەرکووک.

زانیاریی زیاتر: ئەندامانی گرووپەکە لە کۆنسێرتەکان بە جلوبەرگی نەتەوە جیاوازەکانی کەرکووکەوە دەردەکەون و بە زمانەکانی کوردی، عەرەبی و تورکمانی، بەستە و مەقام پێشکەشی ئامادەبووان دەکەن. بە زمانی کوردی ژەنیار و مەقام بێژ حەمە گەرمیانی، مەقامەکانی ناوچەی گەرمیان، ئەڵاوەیسی، قەتار، خاوکەر، خورشیدی و ئای ئای پێشکەش دەکات. بەزمانی عەرەبی و تورکیش مەقام بێژی تورکمان، ئەحمەد نەجیب، مەقامە تورکییەکانی وەک قۆریات، ئۆرفە و حیجاز پێشکەش دەکات هەروەها لەگەڵیدا مەقامەکانی عەرەبییش وەک شەرقی ڕاست، بەیات، غەزەل، حیجاز، سێ گا و عەجەم پێشکەش دەکات.

ئەمەش بزانە: لە دوای گرووپی موزیکی کامگاران، ئەمە دووەمین گرووپی موزیکیە بە فەرمی لە ئەمریکا کۆنسێرت بکەن.