بۆ یەكەمجار پرۆسەی دادگاییكردن بە ئۆنلاین لە هەرێمی كوردستان بەڕێوەدەچێت

ئاڤا نیوز

 

سبەی یەكەم پرۆسەی دادبینی لە دادگای نەوجەوانانی هەولێر بەشێوەی ئۆنلاین بەڕێوەدەچێت لە چوارچێوەی دەستپێكردنی "دادگای هاوڕێی منداڵان".

 

وێنە گەورەكە: ڕێكخراوی نەتەوەیەكگرتووەكان بۆ بەدەنگەوەهاتنی منداڵان بەهەماهەنگی ئەنجوومەنی دادوەریی هەرێمی كوردستان، لە چوارچێوەی پاراستنی مافەكانی منداڵان، هەوڵدەدات دۆخی دەروونی گیراوان و بەندكراوانی مێرمنداڵ، منداڵی ناكام و ئەو مێرمنداڵانەی دووچاری تاوانكردن هاتوون لەبەرچاو بگرێت، بۆ ئەوەی ڕاپێچی دادگا نەكرێن و ڕاستەوخۆ لەڕێگەی ئۆنلاینەوە هەر لەشوێنی مانەوەیان لە چاكسازییەكان بەشێوەی ئۆنلاین دادبینی بكرێن، كە پڕۆژەكە بە دادگای هاوڕێی منداڵان ناودەبرێت.

 

لێدوانی فەرمی: ماڵپەڕی فەرمی ڕێكخراوی "یونیسێف" بڵاویكردووەتەوە، سبەی پێنجشەممە 05-12-2024، دادگای تێهەڵچوونەوەی ناوچەی هەولێر هەڵدەستێت بە كردنەوەی یەكەم پرۆسەی دادبینی لە دادگای نەوجەوانانی هەولێر بەشێوەی ئۆنلاین.

 

بۆچی گرنگە: منداڵان كاتێك دووچاری تاوان دەبن جگە لە شڵەژانی دۆخی دەروونییان، ترسیان لە ڕاپێچكردنیان بۆ هۆڵی دادگا و ڕێكارە دادوەرییەكان هەیە، هەرێمی كوردستان لەچوارچێوەی بایەخدانی بە پاراستنی مافەكانی منداڵ بۆ یەكەمجار پڕۆژەی دادگاییكردن بە ئۆنلاین پەیڕەو دەكات كە پرۆسەیەكی سەردەمیانە و تەنها لە وڵاتە پێشكەوتووەكان پەیڕەو دەكرێت.