کۆمیسیۆن بۆ ئاڤا: لە هەفتەیەکدا ئەنجامی کۆتایی هەڵبژاردن ڕادەگەیێنین

ئاڤا نیوز

 

کۆمیسیۆنی هەڵبژاردنەکانی عێراق ڕایگەیاند، لەئێستادا سەرقاڵی یەکلاییکردنەوەی سکاڵاکانی ڕۆژی هەڵبژاردن و هەژمارکردنی دەنگە درەنگ گەیشتووەکانن، ئەم پرۆسەیەش هەفتەیەکی پێدەچێت و دواتریش ئەنجامی کۆتایی هەڵبژاردن ڕادەگەیێنن.

 

وێنە گەورەکە: شەوی ڕابردوو کۆمیسیۆنی هەڵبژاردنەکانی عێراق دەنگی لیست و کاندیدەکانی بەشدار لە هەڵبژاردنە پەرلەمانییەکەی 11ی ئەم مانگەی بڵاوکردەوە، بەگوێرەی ئەنجامەکانیش هاوپەیمانی ئاوەدانکردنەوە و گەشەپێدان، پارتی دیموکراتی کوردستان و حیزبی تەقەدووم زۆرترین دەنگیان لەسەر ئاستی عێراق بەدەستهێناوە.

 

لێدوانی فەرمی: بیلال ئەکرەم عەباس، سەرۆکی تیمی ڕاگەیاندن لە کۆمیسیۆنی هەڵبژاردنەکانی عێراق بە ئاڤا میدیای ڕاگەیاند، دوای ئەوەی دوێنێ ئەنجامی بەرایی هەڵبژاردنەکان بەڕێژەی 99.7%ـی دەنگە جیاکراوەکان بڵاوکرایەوە، لەئێستادا کۆمیسیۆن تاوتوێی ئەو سکاڵایانە دەکات کە ڕۆژی 11ی ئەم مانگە لەسەر پرۆسەی دەنگدان تۆمارکراون.

 

وتیشی، لەهەمان کاتیشدا ئێستا جیاکردنەوە و هەژمارکردنی دەنگی ئەو وێستگە و بنکانەی ماون دەستیپێکردووە، دوای کۆتاییهاتنی ئەم دوو پرۆسەیەش، لە ماوەی هەفتەیەکدا ئەنجامی کۆتایی هەڵبژاردنەکان ڕادەگەیێنن.