حەشدی شەعبی بارەگاکانی لە کەرکووک چۆڵ دەکات

ئاڤا نیوز

 

لە ترسی بۆردوومانکردنی ناوچەکانیان، حەشدی شەعبی سەرجەم بارەگاکانی لە سەنتەری شاری کەرکووک چۆڵ کردووە، هەرچی چەک و تەقەمەنی و دۆسیەی نهێنی و مەترسیداری ئەمنی هەیە، گواستوویانەتەوە گوندی بەشیر، بەڵام لە ناوچەکانی دەورووبەری کەرکووک ماون و نەجوڵێنراون.

 

وێنە گەورەکە: حەشدی شەعبی کە له‌ 16ـی ئۆكته‌ری ساڵی 2017 هێزەکانیان لە کەرکووک و دەورووبەری جێگیر بوون، ئێستا 12 بارەگایان لەنێو شاردا هەیە و چەکدارانیان لەو بارەگایانە گواستوونەتەوە گوندی بەشیر، کە دانیشتووانەكەی توركمانی شیعە مەزهەبن و 30 کیلۆمەتر لە سەنتەری شاری کەرکووکەوە دوورە.

 

زانیاریی تایبەت: حەشدی شەعبی جگە لە هێزەکانیان، چەک و دۆسیە ئەمنییەکانیشیان گواستووەتەوە ئەو گوندە، ئەو بارەگایانەی لەنێو شاردا چۆلكراون تەنیا چەند پاسەوانێکیان هێشتووەتەوە، چەند ڕۆژێکە بەتەواوەتی جووڵەی چەکدارانیان لە نێو شاری کەرکووک نابینرێت.

 

زانیاریی زیاتر: بەگوێرەی بەدواداچوونی ئاڤا هەرچەندە لە گوندی بەشیریش مەترسی بۆردوومانکردنی پێگەکانی حەشدی شەعبی هەیە، بەڵام گومان دەکرێت چەکدارەکان دابەشی سەر ماڵەکان کرابن و لەنێو ماڵان خۆیان حەشار دابن، بۆ ئەوەی لە مەترسی بۆردوومانکردن دووربن.

 

ئەوەی پێویستە بیزانیت: دوای هێرشە بەردەوامەکانی گرووپە چەکدارەکانی بەرەی مقاوەمەی عێراق بۆ سەر ئیسرائیل، ئەو وڵاتە چەندجارێک هەڕەشەی وەڵامدانەوەی لەو گرووپانە کردووە، بۆ خۆپاراستن لە هێرشەکانی ئیسرائیل، ئێستا چەکدارانی بەرەی مقاوەمە بارەگاکانیان لەنێو شاردا چۆڵ کردووە.