بەرگریی شارستانی ڕێنمایی دەدات بەو هۆڵانەی کە ئاهەنگی سەری ساڵ ڕێکدەخەن

ئاڤا نیوز

 

بە مەبەستی ڕێگریكردن لە ڕووداوی ئاگركەوتنەوە و پاراستنی سەلامەتیی هاووڵاتییان لە هۆڵەكانی بۆنە و ئاهەنگ گێڕان بەتایبەت لە پشووەكانی سەری ساڵدا، بەڕێوەبەرايەتیی بەرگریی شارستانیی پارێزگای هەولێر، وردەكاری سیستمی سەلامەتیی ئاگركوژێنەوە بڵاودەكاتەوە.

 

وێنە گەورەكە: پشووەكانی سەری ساڵ نزیك دەبێتەوە و پێشبینی دەكرێت گەشتیارێكی زۆر لە شارەكانی ناوەڕاست و باشووری عێراق و وڵاتانی دراوسێوە، سەردانی هەرێمی كوردستان بكەن، هۆڵەكانی ئاهەنگ گێڕان لەئێستاوە ئامادەكارییەكانیان دەستپێكردووە بۆ سازكردنی كۆنسێرت و پێشوازی لە گەشتیاران.

 

ڕاگەیێنراوی فەرمی: بەڕێوەبەرايەتی بەرگری شارستانی پارێزگای هەولێر ڕایگەیاند، هۆڵەکانی ئاهەنگ گێڕان بەهۆی قەرەباڵغییەکی زۆر و ئەگەری ئاگرکەوتنەوە، پێویستییان بە سیستمی سەلامەتی و ڕزگاربوون لە ئاگر هەیە، بە پێویستی دەزانێت سەرجەمیان پابەندی ڕێنماییەكان بن.

 

چی پێویستە بكرێت: هۆڵەكانی بۆنە و ئاهەنگ گێڕان پێویستە سیستمی دۆزینەوەی ئاگر، زەنگی ئاگاداركردنەوە، دۆزینەوەی پێشوەختەی گەرمی و دووكەڵ و بڵێسە، چاودێری پیشاندانی شوێنی ئاگر، سیستمی ڕشێنەریان هەبێت.

 

زانیاریی زیاتر: هۆڵەكان پێویستە سیستمی دەرچوونی فریاگوزارییان هەبێت و شوێنەكەی بەرچاو و ئاسان بێت، تەنانەت لەكاتی پچڕانی كارەباش دەبێت دەرگاكانی دەرچوون ڕووناك بێت.