ئازربایجان ماڵێکی بازرگانی لە هەرێمی كوردستان دەکاتەوە

ئاڤا نیوز

 

ماڵی بازرگانی كۆماری ئازربایجان لە هەرێمی كوردستان دەستی بەكارەكانی كرد، ماڵەکە دەبێتە پردی پەیوەندیی نێوان سەرمایەداران و خاوەن كۆمپانیاكانی ئازربایجان و هەرێمی كوردستان.

 

وێنە گەورەكە: دوای ئەوەی لەڕۆژی 23-12-2024، مۆڵەتی كاركردنی لە وەزارەتی بازرگانی و پیشەسازیی حكومەتی هەرێمی كوردستان پێدرا، ئەمڕۆ 25-12-2024، ماڵی بازرگانی كۆماری ئازربایجان لە هەرێمی كوردستان دەستی بەكارەكانی كرد.

 

لێدوانی فەرمی: بیوك ئەحمەدوڤا، دامەزرێنەری ماڵی بازرگانیی ئازربایجان، بە ماڵپەڕی فەرمی حكومەتی هەرێمی كوردستانی ڕاگەیاندووە، هەرێمی كوردستان لەڕێگەی وەزارەتی بازرگانی و پیشەسازییەوە بۆ کردنەوەی ئەم ماڵە بازرگانییە كارئاسانی زۆریان بۆ كردووین، "دۆخی سەقامگیر و ئارامی هەرێمی كوردستان فاكتەرێكی گرنگە بۆ سەرمایەگوزاری و پەرەپێدانی كەرتە ئابوورییەكان".

 

بۆچی گرنگە: كردنەوەی ماڵی بازرگانیی ئازربایجان هەلومەرجی لەبار بۆ پەرەپێدانی زیاتری پەیوەندییەكانی نێوان هەرێمی كوردستان و كۆماری ئازربایجان لەڕووی بازرگانی و ئابوورییەوە دەڕەخسێنێت لە چوارچێوەی بەگەڕخستنی سەرمایەی بیانی لە هەرێمی كوردستان.