دوای شەش مانگ "ئەنەکەسە" سەرۆکێکی نوێی هەڵبژارد

ئاڤا نیوز

 

بەپێی پەیڕەوی ئەنجوومەنی نیشتمانی کورد لە سووریا (ئەنەکەسە)، هەر شەش مانگ جارێک ئەو ئەنجوومەنە سەرۆکێکی نوێ هەڵدەبژێرێت، ئەمڕۆ محەممەد ئیسماعیل وەک سەرۆکی نوێی ئەنەکەسە هەڵبژێردرا.

 

وێنە گەورەکە: ئەنجوومەنی نیشتمانی کورد لە سووریا، دامەزراوەیەکی سیاسییە دوای سەرهەڵدانی خۆپیشاندانەکانی سووریا لە شاری هەولێر دامەزراوە. دەستەی سەرۆکایەتیی ئەنەکەسە لە حەوت کەس پێکدێت، بەڵام لەبنەڕەتدا ئەو ئەنجومەنە 17 حزب لەخۆدەگرێت.

 

لێدوانی فەرمی: نەواف ڕەشید، ئەندامی نوێنەرایەتیی ئەنەکەسە لە هەرێمی کوردستان بە ئاڤا میدیای ڕاگەیاند، پرۆسەی گۆڕینی سەرۆک لە ئەنجوومەن بە ئاسایی بەڕێوەچوو، ماوەی سەرۆکایەتیی سلێمان ئۆسۆ تەواو بوو، محەممەد ئیسماعیل خۆی هەڵبژارد و هیچ ڕکابەرێکی نەبوو، بە تێکڕای دەنگی ئەندامان کرایە سەرۆکی نوێی ئەنجوومەنی کورد لە سووریا.

 

ئەوەی پێویستە بیزانیت: ئەنەکەسە، ماوەی 13 ساڵە بەهۆی ناکۆکییەکانیان لەگەڵ یەپەگە، لە باشووری کوردستان چالاکی حزبی ئەنجامدەدەن، لەماوەی چەند ڕۆژی ڕابردوودا یەکەم دانیشتن لەنێوان نوێنەری ئەنەکەسە و مەزڵووم عەبدی، فەرماندەی هێزەکانی سووریای دیموکرات ئەنجامدرا.