لە ساڵی 2025 یەکەمی حاڵەتی گیان لەدەستدان بەهۆی هەڵدێران تۆمارکرا

ئاڤا نیوز

 

ئەمڕۆ پێنجشەممە هاووڵاتیەکی تەمەن 45 ساڵانی دانیشتووی سۆران لە چیای زۆزک هەڵدێرا و گیانی لەدەستدا، ئەمەش بە یەکەم حاڵەتی گیانلەدەستانی ڕووداوی هەڵدێران لە ساڵی 2025 دادەنرێت لە هەرێمی کوردستان.

 

چیرۆکی سەرەکی:  ڕۆژی 2-1-2024، چوار کەس بە مەبەستی شاخەوانی سەردانی چیای زۆزکیان لە ئیدارەی سەربەخۆی سۆران کرد، یەکێک لە شاخوانەکان پەیوەندی بە بەرگریی شارستانیی سۆران دەکات کە هاورێیەکیان هەڵدێراوە، شوینەکەی سەخت بووە و نەتوانراوە بە ئۆتۆمبێل بە هانای هاووڵاتیەکەوە بچن، تا تیمەکانی بەرگری شارستانی سۆران گەیشتوون بە شوێنی ڕووداوەکە هاووڵاتیەکە گیانی لەدەستداوە.

 

لێدانی فەرمی: ڕەوەند هاودیانی، وتەبێژی بەرگری شارستانی سۆران بە ئاڤا میدیای ڕاگەیاند: "ئاگادارکراینەوە کە هاووڵاتیەک لە چیای زۆزک هەڵدێراوە، تا ئێمە گەیشتین بە شوێنی ڕووداوەکە، هاووڵاتیەکە گیانی لەدەستدابوو. دەشڵێت، ئەو کاتەی پەیوەندی بە ئێمەوە کرا هاووڵاتیەکە گیانی لەدەستنەدابوو.

زانیاریی زیاتر: هاووڵاتییەکە ناوی عەزیز ئیساعیلە و تەمەنی 45 ساڵە، دانیشتووی شاری سۆرانە.

 

ئەوەی پێویستە بیزانیت: بەپێی زانیارییەکانی بەرگریی شارستانیی سۆران، لە ساڵی 2024ـدا ژمارەی ئەو هاووڵاتییانەی بە هۆی هەڵدێرانەوە گیانیان لەدەستداوە سێ هاووڵاتین. هاوکات یەک حاڵەتی گیان لەدەستدان بەهۆی تەمومژ و سەرما و سۆڵە گیانی لەدەستداوە، لەگەڵ ئەوەشدا یەک حاڵەتی گیرخواردن لەناو بەفر هەبوو کە خێزانێک بوو، بەڵام لەلایەنی تیمی بەرگریی شارستانیی سۆران ڕزگار کران.