سەباح سوبحی: بابەتی هەناردەكردنەوەی نەوت سیاسییە و چەند گرفتێكیش هەن

ئاڤا نیوز

 

ئەندامی لیژنەی نەوت و غاز لە پەرلەمانی عێراق ڕایگەیاند، کێشەی هەناردەنەکردنەوەی نەوتی هەرێمی کوردستان تەنیا تەکنیکی نییە و پرسەکە بە سیاسیی کراوە. 

 

بۆچی گرنگە: ڕاگرتنی هەناردەكردنی نەوتی هەرێمی كوردستان گرفتی دارایی گەورەی بۆ عێراق و هەرێمی كوردستان دروست كردووە و بە دەستپێكردنەوەشی گرفتەكە چارەسەر دەبێت، یەكێك لە گرفتە گەورەكان دواكەوتنی دابەشكردنی مووچەی فەرمانبەرانی هەرێمی كوردستانە، بەپێی داتاكان، بەهۆی ڕاگرتنەكە عێراق زیانی زیاتر لە 20 ملیار دۆلاری كردووە.

 

لێدوانی فەرمی: سەباح سوبحی، ئەندامی لیژنەی نەوت و غاز لە پەرلەمانی عێراق بە ئاڤا میدیای ڕاگەیاند: بابەتی هەناردەكردنەوەی نەوتی هەرێمی كوردستان سیاسییە و تەنیا تەكنیكی نییە، گرفتەكانی بەردەم پرۆسەكە لە ساڵی 2014ەوە دەستیان پێكرد تا گەیشتە ڕاگرتنی هەناردەكردن لەلایەن دادگەی ناوبژیوانیی نێودەوڵەتی.

 

هۆكارە زانراوەكان: دواكەوتنی دەستپێكردنەوەی هەناردەكردنەوەی نەوت دەگەڕێتەوە بۆ ڕێكنەكەوتنی لایەنەكان لەسەر تێچووی دەرهێنانی نەوت، كۆمپانیاكانی دەرهێنانی نەوت لە هەرێمی كوردستان داوای زیادكردنی دەكەن و وەزارەتی نەوتیش پشت بە ماددە یاساییەكانی نێو یاسای بودجە دەبەستێت كە دەڵێت نابێت لە پارێزگایەك بۆ پارێزگایەكی دیكە نرخەكان جیاواز بن.

چارەسەرەكان: بۆ چارەسەركردنی گرفتی نرخی تێچووی دەرهێنانی نەوت لە هەرێمی كوردستان، هەمواری یاسای بودجە لە پەرلەمانی عێراقە و خوێندنەوەی یەكەمیشی بۆ كراوە و تیایدا چارەسەری بابەتەكە خراوەتە، چارەسەرەكەش دوو جۆرە.

-بابەتەكە بدرێت بە دەستەیەكی ڕاوێژكاریی نێودەوڵەتیی پسپۆر بۆ ئەوەی خەمڵاندن بۆ دەرهێنانی نەوت لە هەر ناوچە و كێڵگەیەك بكەن.

- 16 دۆلار جێگیر بكرێت بۆ تێچووی دەرهێنانی هەر بەرمیلێك نەوتی هەرێمی كوردستان بۆ كۆمپانیاكان.

 

لەلایەكی دیكەوە: فراكسیۆنە كوردییەكان تێبینیان لەسەر ناوەڕۆكی هەموارەكە هەیە ئەویش ئەوەیە كە كاتی كاركردن و مانەوەی دەستە ڕاوێژكارییەكە دیارنەكراوە، هاوكات باس لە قەرزی كۆمپانیاكان كە لەلای حكومەتی هەرێمی كوردستانە نەكراوە ئاخۆ چۆن چارەسەر دەكرێت و چۆن دەدرێتەوە.