دوو دەروازەی سنووریی هەرێمی کوردستان زۆرترین ترانزێتی ئێران پێکدەهێنن

ئاڤا نیوز

 

بەرپرسی خاڵە گومرگیەكانی ئێران ڕایدەگەیەنێت، هەردوو دەروازەی سنووری نێودەوڵەتیی پەروێزخان و باشماخ بەرزترین هاتووچۆی ترانزێتی ئێران پێكدەهێنن.

 

لێدوانی فەرمی: فورود عەسکەری، بەرپرسی گومرگی ئێران، بەیاننامەیەکی بڵاوکردۆتەوە و ئاماژەی بەوە كردووە، لە ماوەی 9 مانگی ڕابردوودا، ترانزێتی دەرەکی لە ڕێگەی ئێرانەوە بە ڕێژەی 31% زیادی کردووە و گەیشتووەتە 16 ملیۆن و 500 هەزار تۆن.

 

عەسكەری ڕوونیشی کردووەتەوە، گومرگەكانی شەهید ڕەجایی و پەروێزخان و باشماخ، سێ گومرگی سەرەکی ترانزێتی ئێرانن، کە نوێنەرایەتی زۆرترین بڕی کاڵای ترانزێت لە نێوان سەرجەم گومرگەكانی ئێران پێكدەهێنن.

 

ژمارەكان وا دەڵێن: لە ماوەی نۆ مانگدا، بڕی 4.4 ملیۆن تۆن کاڵا لە فەرمانگەی گومرگی شەهید ڕەجایی، 3.8 ملیۆن تۆن لە فەرمانگەی گومرگی پەروێزخان و 2.3 ملیۆن تۆن لە فەرمانگەی گومرگی باشماخەوە ئاڵوگۆڕی پێكراوە.