پەرلەمانتارێکی دەم پارتی بۆ ئاڤا: شاندی ئیمراڵی سەردانی سەڵاحەدین دەمیرتاش دەکات

ئاڤا نیوز

 

شاندێکی پەلەمانتارانی کورد بۆ ئاڤا میدیا ئاشکرایان کرد، دوای سەردانەکەیان بۆ گرتووخانەی ئیمرالی و چاوپێکەوتنیان لەگەڵ عەبدوڵڵا ئۆجەلان، لەم هەفتەیەدا سەردانی سەڵاحەدین دەمیرتاش دەکەن.

 

لێدوانی فەرمی: محەممەد کەماچ، پەرلەمانتاری دەم پارتی بە ئاڤامیدیای ڕاگەیاند: شاندەکەی ئیمراڵی کە سەردانی عەبدوڵڵا ئۆجەلان، ڕێبەری پەکەکەیان لە گرتووخانەی ئیمراڵی کرد، لەم هەفتەیەدا سەردانی سەرجەم پارت و لایەنە سیاسییەکان دەکەن، سەڵاحەدین دەمیرتاش، سەرۆکی پێشووی هەدەپە لە نێو لیستەکەدایە.

 

ئەوەی پێویستە بیزانیت: شاندەکەی ئیمراڵی کە لە سڕ سورەیا ئۆندار، پەروین بوڵدان، ئەحمەد تورک پێک دێت، لە چەند ڕۆژی ڕابردوو سەردانی هەریەک لە دەوڵەت باخچەلی، سەرۆکی مەهەپە و نوعمان کورتوڵموشئۆغلو، سەرۆکی پەرلەمانی تورکیایان کردبوو، سەردانەکەیان بە ئەرێنی و هیوابەخش ناوبرد.

 

زانیاریی بەدەستهاتوو: بە پێی زانیارییەکانی ئەو پەرلەمانتارە، دەم پارتی سەردانی دەمیرتاش دەکات، بەڵام کات و  ڕۆژەکەی دیاری نەکراوە، ئەوەشی ئاشکرا کرد کە شاندەکەی دەم پارتی لەم هەفتەیەدا  لیستی سەردانەکانی بۆ سەرجەم لایەنە سیاسییەکان تەواو دەکات، ئەمەش بەو مانایە دێت هەر لەم هەفتەیە، سەردانی ئاکپارتی و جەهەپە و دەمیرتاش دەکەن.

 

قووڵتر: هەوڵەکان بۆ خستنەگەڕی پرۆسەیەک بۆ دانووستان لەبارەی پرسی ئاشتەوایی کورد بەردەوامە، هێشتا ئەو پرۆسەیە دەستی بە کارەکانی نەکردووە و ناوێکی دیاریکراویشی بۆ دانەنراوە، بەڵام ئیرادەیەکی جددی هەیە لەلایەن دەسەڵات و ئۆپۆزسیۆن و کورد بۆ دەستپێکردنی پرۆسەکە.